ამ დრომდე უცნობია გადადგება თუ არა იუსტიციის მინისტრი თეა წულუკიანი. როგორც „ნიუპოსტს“ სამინისტროს პრესსამსახურში განუცხადეს, მინისტრი ჩვეულ რეჟიმში განაგრძობს მუშაობას.

მათივე თქმით, თეა წულუკიანი რაიმე სახის განცხადების გაკეთებას არ გეგმავს.

თავდაცვის მინისტრის პოსტიდან გადაყენების შემდეგ თანამდებობა დატოვეს, მისმა თანაპარტიელებმა, სახელმწიფო მინისტრმა ალექსი პეტრიაშვილმა და საგარეო საქმეთა მინისტრმა მაია ფანჯიკიძემ, მოადგილეებთან ერთად.

ალასანიას თანაპარტიელი, თეა წულუკიანი, თავდაცვის სამინისტროს მაღალჩინოსნების დაკავების ფაქტებს 2 დღის წინ გამოეხმაურა და პროკურატურა ასასანიასადმი უპატივცემულობაში დაადანაშაულა. მისი თქმით, ალასანიას უწყებაში მომხდარის გამო დაირღვა ძალოვან სტრუქტურებში არსებული დაუწერელი წესი, რაც ძალოვნების მხრიდან მინისტრის პატივისცემას გულისხმობს. ამ განცხადების შემდეგ იუსტიციის მინისტრს კომენტარი აღარ გაუკეთებია. ის გუშინ საპარლამენტო უმრავლესობის წევრების პრემიერ მინისტრთან შეხვედრას ესწრებოდა. ალასანიას გუნდის წევრი და პარტია "თავისუფალი დემოკრატების" დამფუძნებელი ამ დრომდე იუსტიციის მინისტრის პოსტს იკავებს.