თავდაცვის ყოფილი მინისტრი ირაკლი ალასანია თანამშრომლებს დაემშვიდობა.

ექს-მინისტრი თავდაცვის უწყებაში ცოტა ხნის წინ იმყოფებოდა. ალასანიამ იმედი გამოთქვა, რომ მიმდინარე მოვლენები შეიარაღებულ ძალებს და მისი სისტემის ფუნქციონირებას არ შეეხება.

„ეს არ არის ისეთი დამშვიდობება. იმედი გვქონდეს, რომ მომავალში საზოგადოებრივ თუ საჯარო სარბიელზე მუშაობას ისევ გავაგრძელებთ. ერთ-ერთი, რითაც მე ვამაყობ არის ის, რომ ეს უწყება გახდა არაპოლიტიკური. მინდა ვთქვა, რომ რა გადაწყვეტილებებიც იქნა მიღებული არ უნდა შეეხოს შეიარაღებულ ძალებს და ამ სისტემის ფუნქციონირებს. ჩვენ მაშინ ვართ ძლიერები, როდესაც ესეთი რყევები არ ეხება ინსტიტუტებს. ჩვენი ქვეყანა ყველანაირ ძნელბედობას გადაიტანს, მთავარია საზოგადოება შეკრული დარჩეს. ჯარმა უნდა იგრძნოს, რომ საზოგადოება მის გვერდზეა. პირადად მე, მინდა გითხრათ, რომ ყველას სათითოად გვთვლით მეგობრებად და ეს მეგობრება ცხოვრების ბოლომდე გაგვყვება. დიდი მადლობა, რომ ასეთი საქმეები ერთად გავაკეთეთ. მომავალი თანამშრომლობის იმედით დაგემშვიდობებით“, - მიმართა ალასანიამ თანამშრომლებს.

თავდაცვის მინისტრის პოსტზე პრემიერმა მინდია ჯანელიძე წარადგინა.