პრემიერ-მინისტრმა თავდაცვის მინისტრის პოსტზე მინდია ჯანელიძე ოფიციალურად წარადგინა. "დარწმუნებული ვარ ჯანელიძე იქნება ბევრად უფრო უკეთესი მინისტრი, ვიდრე მისი წინამორბედი", განაცხადა პრემიერ მინისტრმა, ჯანელიძის თავდაცვის მინისტრის პოსტზე დანიშვნისას.

ჯანელიძე ამ დრომდე სახელმწიფო უსაფრთხოებისა და კრიზისების მართვის საბჭოს მდივანად მუშაობდა.

ირაკლი ღარიბაშვილის შინაგან საქმეთა მინისტრობის პერიოდში კი კონტრდაზვერვის დეპარტამენტს ხელმძღვანელობდა.

„წარმოგიდგენთ თავდაცვის ახალ მინისტრს, მინდია ჯანელიძეს, რომელიც იყო ჩემი თანაშემწე უსაფრთხოების საკითხებში. იგი გახლავთ პროფესიით იურისტი, დამატებითი განათლება მიღებული აქვს აშშ-ში და დიდ ბრიტანეთში. იგი მუშაობდა საქართველოს დაზვრევის სამსახურში, 2012 წლიდან 2014 წლის დასაწყისამდე ხელმძღვანელობდა შს სამინისტროს კონტრდაზვერვის დეპარტამენტს. მინდია ჯანელიძე გახლავთ პოლკოვნიკი, მას მიღებული აქვს სხვადასხვა ჯილდო, ჰყავს ოჯახი, მეუღლე და სამი შვილი, მე მინდა წარმატებები ვუსურვო ბატონ მინდია ჯანელიძეს. იმედი მაქვს იქნება უკეთესი მინისტრი, ვიდრე იყო მისი წინამორბედი“, - განაცხადა ღარიბაშვილმა.

ირაკლი ალასანია თავდაცვის მინისტრის პოსტიდან პრემიერმა გუშინ გადააყენა.