„ივანიშვილი დაემხობა, თუმცა ამ დამხობას საქართველოში რუსეთის ხელის გაშლა არ უნდა მოჰყვეს“, - ამის შესახებ ექს-პრეზიდენტმა მიხეილ სააკაშვილმა „Forbes“- თან ინტერვიუში განაცხადა.

სააკაშვილმა საქართველოში მიმდინარე პოლიტიკურ მოვლენებზე ისაუბრა და აღნიშნა, რომ ქვეყანა „პოლიტიკური ოფშორიდან იმართება“.

„ივანიშვილი დაემხობა. ჩვენი მიზანია, რომ ეს პროცესი, რაც არის გარდაუვალი, მოხდეს ისე, რომ ამას არ მოჰყვეს საქართველოში რუსეთის ხელის გაშლა და ბოლომდე საქართველოს სუვერენიტეტის მოთხრა. ან თუნდაც, არ მოხდეს საქართველოში ის ძალადობა, რაც უკრაინაში მოხდა. მთავარი რაც მოხდა ქვეყანაში არის ის, რომ ქვეყანა კონსტიტუციური სისტემიდან გავიდა. სინამდვილეში მთავარი რაღაც მოიშალა, ქვეყანა პოლიტიკური ოფშორიდან იმართება. ყველა გადაწყვეტილებას იღებს ერთი კაცი, რომელიც არაფერზე პასუხს არ აგებს“, - განაცხადა სააკაშვილმა.

ექს-პრეზიდენტმა ბიძინა ივანიშვილის ახლო ნათესავზე უჩა მამაცაშვილზეც ისაუბრა.

„უჩა მამაცაშვილი, რომელიც მისი დეიდაშვილის ყველა დიდ საწარმოშია და გადაზიდვის ყველა დიდ თემას აზის ისე, როგორც თავის დროზე ნუგზარ შევარდნაძე, მაგრამ უფრო მეტად. ერთად რომ ავიღოთ ნუგზარ შევარდნაძე, ვანო ჩხარტიშვილი, კახა თარგამაძე, ირაკლი ქუთათელაძე, ეს ყველა ერთად რასაც აკეთებდა, ყველაფერს ერთად აკეთებს მამაცაშვილი“, - განაცხადა სააკაშვილმა.