თანამდებობიდან გათავისუფლებული თავდაცვის მინისტრი ირაკლი ალასანია, დღეს პრემიერმინისტრ ირაკლი ღარიბაშვილს შეხვდება. ირაკლი ალასანია კოალიციის პოლიტსაბჭოს გაფართოებულ სხდომაზე მისვლას გეგმავს. იგი ყველა იმ დეტალის გარკვევას აპირებს, რომელიც ყოფილ მინისტრს აინტერესებს, მათ შორის ისიც, თუ საით მიდის ქვეყანა.

ყოფილი თავდაცვის მინისტრი პრემიერის გადაწყვეტილებას პროკურორის გადაწყვეტილებად აფასებს.

„მე მართლაც, მისი განცხადებიდან გამომდინარე, მასში პრემიერზე მეტად პროკურორი დავინახე. აქედან გამომდინარე, კიდევ ერთხელ, აშკარად ჩანს, რომ ის ენდობა პროკურატურას და არ ენდობა იმას, რაზეც ვსაუბრობდი მე. გადაწყვეტილება, რაც მიიღო, მისი პრეროგატივა იყო. ჩვენ შევხვდებით, ძალიან ბევრ საკითხს განვიხილავთ, მათ შორის არა მხოლოდ ამ შემოტევას და დაკავებებს თავდაცვის სამინისტროში, ჩვენ განვიხილავთ, თუ საითკენ მიდის ქვეყანა. რა მომავლისკენ მიჰყავს პროკურატურას თავისი ნაბიჯებით ჩვენი ქვეყანა და ის ვინც, ამაზეა პასუხისმგებელი, უნდა დაისაჯოს. ჯარი არის დეპოლიტიზირებული, სამხედროები არანაირ პოლიტიკურ ინსინუაციებში არ ერევიან“, - განაცხადა ალასანიამ.