„რესპუბლიკური" პარტიის წევრი დავით ბერძენიშვილის თქმით „თავისუფალი დემოკრატების“ 10 მანდატის გარეშე კოალიციას უმრავლესობა არ აქვს" ამის შესახებ განცხადება მან „რუსთავი 2"-ის პირდაპირ ეთერში გააკეთა.

„იმის პარალელურად, როცა კოალიცია განიხილავდა ალასანიას საკითხს, „თავისუფალმა დემოკრატებმა“ მოახდინეს დემონსტრირება, რომ ეს გუნდი ერთიანია. ამით, ილუზიები, რომ ალასანია წავა, 2-3 კაცი გაყვება და სხვა დეპუტატები დარჩებიან, გაქარწყლდა",-ამბობს ბერძენიშვილი.

დავით ბერძენიშვილის ინფორმაციით, იყო ჯანსაღი კამათი და მათ სოლიდარობა გამოუცხადეს მთავარ პოლიტიკურ პარტნიორს, „თავისუფალ დემოკრატებს“. მისი თქმით, ბიძინა ივანიშვილისთვისაც, როდესაც მან დაიწყო პოლიტიკაში მოსვლა, მთავარი პოლიტიკური პარტნიორები „თავისუფალი დემოკრატები“ იყვნენ.

„რაც უნდა მოხდეს, რესპუბლიკელები ვიქნებით ივანიშვილის მადლიერები, მაგრამ მიმდინარეობს პოლიტიკური პროცესი, რომელიც აჩვენებს, რომ ვართ ახალ რეალობაში. როდესაც მივმართეთ კოალიციის ახალ სუბიექტებს, მაშინაც ვწერდით, რომ კოალიცია ძირითადად გაუმკლავდა პრობლემებს, დაამარცხა სააკაშვილი, ასოცირების ხელშეკრულების შემდეგ, სამიტების შემდეგ, პირველი ეტაპი დამთავრდა. დღეს ქვეყანას მართავს ხელისუფლება, რომელიც არის სახელად კოალიციური და არსით არაა კოალიციური".