საპარლამენტო უმრავლესობის წევრი დავით საგანელიძე ირაკლი ალასანიას განცხადებას ეხმაურება. საგანელიძე აცხადებს, რომ მისთვის მიუღებელია თავდაცვის მინისტრის თანამდებობაზე იყოს ისეთი მინისტრი, რომელიც პროკურატურას გვერდით არ უდგას:

„აშკარად ჩანს კორუფციული გარიგებები, აშკარად ჩანს ფინანსური დარღვევები და ამის ფონზე კეთდება განცხადება, რომ ევროატლანტიკურ სივრცეში, ჩვენი ქვეყნის წინსვლა ფერხდება და ესაა ბრძოლა ამის წინააღმდეგ. მეც ამ გუნდის წევრი ვარ, მეც ამ გზაზე ვარ და ამას ნურავინ დამაბრალებს, რომ თუ კორუფციას თვალი არ დავუხუჭეთ, თურმე ევროატლანტიკური გზისკენ რაღაც ფერხდება. ეს ნიშნავს იმას, რომ პოლიტიკურ ნიღაბს ამოვეფაროთ და პოლიტიკა წინ დავიყენოთ და ამის უკან ფინანსურ მახინაციებს გზა მივცეთ და მწვანე ავუნთოთ. შესაბამისად ყოველივე ამ განცხადების შემდეგ, ისეთ მნიშვნელოვან უწყებას, როგორიც არის თავდაცვის სამინისტრო, რომლის პირველი პირი რა თქმა უნდა იყოს გუნდის წევრი, რომელიც აბსოლუტურად სწორად უნდა აანალიზებდეს სიტუაციას, მის სამინისტროში რა მოხდა, უნდა ედგას გვერდით პროკურატურას და იძიებდეს მათთან ერთად ამ საკითხს, არ იქნება მართებული ამ პიროვნების თანამდებობაზე ყოფნა“, - განაცხადა დავით საგანელიძემ.