ვის სჯერა დღეს, რომ თავდაცვის მაღალჩინოსნების საქმეს პოლიტიკური დატვირთვა არ აქვს?

ვის სჯერა დღეს, რომ თავდაცვის მაღალჩინოსნების საქმეს პოლიტიკური დატვირთვა არ აქვს? - ბაჩუკი ქარდავა

პოლიტიკა - 17:26, 04 Nov, 2014

1951

თავდაცვის სამინისტროს მაღალჩინოსნების დაკავებაზე ისაუბრა „ეროვნულ-დემოკრატიული პარტიის“ ლიდერმა ,,კვირას" პრესკლუბში. ბაჩუკი ქარდავას განცხადებით დაუჯერებელია, რომ აღნიშნულ საქმეში მხოლოდ კანონის გადაცდომაზე იყოს საუბარი, მისივე შეფასებით, გარდა სამართლებრივისა ამ საქმეს აშკარად პოლიტიკური შინაარსი გააჩნია.

ქარდავას განცხადებით, ის ფაქტი, რომ ბატიაშვილის დაკითხვის შემდეგ ორი ოქმი არსებობდა, მოწმობს იმას, რომ პროკურატურის წარმომადგენლებს ბატიაშვილთან გარკვეული გარიგების მცდელობა ჰქონდათ.

ედპ-ს ლიდერმა თავის დროზე, ბიძინა ივანიშვილის მიერ დაანონსებული თავდაცვის უწყების შემოწმებას გაიხსენა.

„მსუბუქად რომ ვთქვათ, პროკურატურა ხშირად ისეთ საკითხებზე იღებს პასუხისმგებლობას, რაც ბევრი კითხვის ნიშანს ტოვებს. პროკურატურა ხშირად ტოვებს ისეთ განცდას, რომ მას სამართლის უზენაესობის დაცვის გარდა გარკვეული პოლიტიკური ფუნქციაც აკისრია. პროკურატურის თანამშრომლების გარდა, ალბათ, ქვეყანაში ორ ადამიანს ვერ იპოვით, ვისაც სჯერა, რომ აქ მხოლოდ კანონიერ გადაცდომაზეა საუბარი და აბსოლუტურად სუფთაა ეს თემა პოლიტიკისგან. როცა საკმაოდ მაღალი თანამდებობის პირი, თავდაცვის მინისტრის მოადგილე დაკითხვის შემდეგ ოქმს ხელს არ აწერს იმ მოტივით, რომ დაკითხვა დარღვევებით წარიმართა, მოწმობს იმას, რომ ქვეყანაში ყველაფერი რიგზე ვერ არის. იმედი მაქვს, ამ საკითხზე პროკურატურა თავის პოზიციას დააფიქსირებს. საერთოდ, პარადოქსია და წარმოუდგენელია მეორე ოქმის მიტანა. რას ნიშნავს ორი ოქმი. ეს იმას ნიშნავს, რომ მასთან გარკვეული გარიგების მცდელობა იყო, სხვა შემთხვევაში წარმოუდგენელია, რაში დასჭირდათ ორი ოქმი. პროკურატურას ჯერჯერობით რამე საფუძვლიანი არაფერი უთქვამს. ბიძინა ივანიშვილმა საპრეზიდენტო არჩევნების წინ ერთხელ უკვე ისაუბრა და დააანონსა პროკურატურის მხრიდან თავდაცვის სამინისტროს შემოწმების აუცილებლობა. თავდაცვის სამინისტრო იმდენად დარწმუნებულია თავის სიმართლეში, რომ გრიფ „საიდუმლოს“ მოხსნა და გასაჯაროება მას გარკვეულ პრივილეგიას ანიჭებს“,- განაცხადა ბაჩუკი ქარდავამ.