ცხინვალის საოკუპაციო რეჟიმის ყოფილი პრეზიდენტის ედუარდ კოკოითის განცხადებას თრუსოს ხეობასთან დაკავშირებით, საქართველოს საპარლამენტო უმცირესობისა და უმრავლესობის წევრები ეხმაურებიან. ვიქტორ დოლიძის განმარტებით, ნებისმიერი პროვოკაციული განცხადება დესტრუქციული ქმედებაა:

„ნებისმიერი პროვოკაციული განცხადება არის დესტრუქციული ქმედება. კიდევ ერთხელ მინდა მოვუწოდო ჩვენს აფხაზ დებსა და ძმებს, ისევე როგორც ჩვენ ოს დებსა და ძმებს, რომ ჟენევის პროცესი, რომელშიც მთელ საერთაშორისო თანამეგობრობაა პრაქტიკულად ჩართული, იყოს აპრობირებული მაქსიმალურად“, - განაცხადა ვიქტორ დოლიძემ.

„ნაციონალური მოძრაობა“ კოკოითის განცხადების უკან უშუალოდ რუსეთს და მის გეგმას ხედავს, რომელიც საქართველოს ტერიტორიული მთლიანობის რღვევას ისახავს მიზნად.

„ცხადია, რომ ამ ორგანიზაციის უკან დგას რუსეთი და ესეც არის იმ მასშტაბური გეგმის ნაწილი, რაც მიზნად ისახავს საქართველოს ტერიტორიული მთლიანობის რღვევას და ჩვენი ქვეყნის მიწების ანექსიას რუსეთის მხრიდან“, - განაცხადა ნუგზარ წიკლაურმა.

31 ოქტომბერს ვლადიკავკაზში გამართულ ოსი ხალხის მეშვიდე ყრილობაზე ედუარდ კოკოითმა განაცხადა, რომ თრუსოს ხეობა ოსებისაა და მისთვის იბრძოლებენ.