,,ხომ არ აქვს ადგილი პოლიტიკურ ანგარიშსწორებას ბატონი ალასანიას მიმართ?“

პოლიტიკა - 17:02, 03 Nov, 2014

1108

საქართველოს თავდაცვის უწყებაში მიმდინარე მოვლენებს „ნიუპოსტთან“ ექსპერტი ნიკა ჩიტიძე აფასებს. ჩიტიძე აცხადებს, რომ გამოძიების დასკვნის დადების შემდეგ აღნიშნული საქმის შეფასება გაცილებით მარტივი იქნება. იმ შემთხვევაში თუ დაკავებული პირების ბრალეულობა დამტკიცდა და მინისტრ ალასანიას პასუხისმგებლობის საკითხი დადგა, შესაძლოა საზოგადოებას გაუჩნდეს კითხვა, რატომ არ დგას იმ თანამდებობის პირების პასუხისმგებლობის საკითხი, რომლებმაც დიდი ოდენობით კრედიტები აიღეს.

„უნდა დაველოდოთ გამოძიებას, ჰქონდა თუ არა სისხლის სამართლის დანაშაულს ადგილი, სასამართლო პროცესი უნდა გაიმართოს და შესაბამისმა ინსტანციებმა გადაწყვეტილებები უნდა მიიღონ. აქედან გამომდინარე, ეს უფრო მოგვცემს გარკვეულწილად იმის საშუალებას, რომ რაიმე დასკვნები გავაკეთოთ.

თვითონ აღნიშნულ ფაქტს რაც შეეხება, თავდაცვის სამინისტროს ერთი პოზიცია აქვს, პროკურატურას მეორე პოზიცია. მეორეა ის ფაქტი, რომ ისმის კითხვა, რატომ არ აეხსნა გრიფით საიდუმლო. არავითარი დოკუმენტი და დამამტკიცებელი საბუთი არ არსებობს იმისა, რომ შესრულებული იქნა ორი მილიონი ლარის სამუშაოები და ექვსი მილიონი დაიხარჯა, 4 მილიონი კი გაიფლანგა, ამის დამადასტურებელი მტკიცებულებები თუ იარსებებს, დასკვნის გაკეთება უფრო მარტივი იქნება.

ასევე უნდა დამტკიცდეს ის, იყო თუ არა მინისტრი საქმის კურსში. აწონილ-დაწონილი უნდა იქნეს მინისტრის საქმიანობა სხვა მიმართულებით, შესაძლოა დავაყენოთ მინისტრის პასუხისმგებლობის საკითხი, მაგრამ საზოგადოებაში გაჩნდება კითხვა, რატომ არ დგას იმ მინისტრების პასუხისმგებლობის საკითხი, რომლებმაც დიდი ოდენობის კრედიტები აიღეს და რა კრიტერიუმით იქნა ეს კრედიტები გაცემული. ამის გამო შესაძლოა დაისვას კითხვა, ხომ არ აქვს ადგილი პოლიტიკურ ანგარიშსწორებას ბატონი ალასანიას მიმართ“, - განაცხადა „ნიუპოსტთან“ საუბრისას ნიკა ჩიტიძემ.