31 ოქტომბერს პარლამენტში გიორგი ბარამიძის გამოსვლას უმრავლესობის რამდენიმე წევრის მხრიდან ვნებათაღელვა და პროტესტი მოჰყვა. ამ ჩხუბის ერთ-ერთი მონაწილე „ქართული ოცნების“ წევრი ომარ ნიშნიანიძე გაზეთ „კვირის ქრონიკასთან“ „ნაციონალურ მოძრაობასთან“ დაკავშირებით საუბრობს:

„ჩვენ პროკურატურასა და გამოძიებას, რომ თავის დროზე ემოქმედა, ახლა ასეთ დღეში არ ვიქნებოდით. პარლამენტში მე სულ ზემოთ რიგში ვზივარ და კარგად მახსოვს, იქ თავის დროზე „ნაციონალები“ წყლის დასალევად ვერ ამოდიოდნენ, ვერ ბედავდნენ, დღეს კიდევ აქეთ გვეჭიმებიან.“

„მარგველაშვილმა რა გააკეთა? ფაქტობრივად „ნაციონალებთან“ ერთ ხმაში ამღერდა, როცა შენი პრეზიდენტი სააკაშვილის ხელქვეითებთან ერთად მღერის , ხომ გეწყინება? რაც „ნაციონალებმა“ ყველას ერთად გაგვიკეთეს, ამის შემდეგ შენს მიერ ხელით ნაგოგმანებმა პრეზიდენტმა მათთან ერთად ჭკუა რატომ უნდა გარიგოს“.

„მე პარლამენტში 15 ნოემბერთან დაკავშირებითაც მინდოდა გამოსვლა, მაგრამ მე პატარა კაცი ვარ და გადამწიეს გვერდზე. მინდოდა ,"ნაციონალებისთვის“ ერთი კარგი მათრახი გადამეჭირა, პირველი ოკუპანტები „ნაციონალები“ იყვნენ და არიან, ესენი ებრძოდნენ ყველაფერს, ეს ყველაფერი მინდოდა მეთქვა პარლამენტის ტრიბუნიდან, მაგრამ ჩამაჩოჩეს.“