თავდაცვის მინისტრის მოადგილე ალექსანდრე ბატიაშვილი კომპანია „სილქნეტის“ კომერციულ დირექტორთან, ბაჩო ცინცალაძესთან ნათესაურ კავშირს ადასტურებს. ამის შესახებ ბატიაშვილმა პროკურატურაში შესვლამდე განაცხადა.

როგორც ცნობილია, საგამოძიებო უწყებაში ბატიაშვილს თავდაცვის სამინისტროს მაღალჩინოსნების საქმეზე დაკითხავენ. მინისტრის მოადგილის დაკითხვა ამ წუთებში მიმდინარეობს.

„პროკურატურაში მოწმის სახით ვარ დაბარებული. მზად ვარ ყველა კითხვას პასუხი გავცე. მოვისმენ შეკითხვებს. რაც შეეხება ბაჩო ცინცალაძესთან ნათესაურ კავშირს, ამ ფაქტს ვადასტურებ. ის ჩემი ნათესავია, მუშაობს „სილქნეტში“, თუმცა ტენდერის დროს შეხება არ მქონია“, - განაცხადა ბატიაშვილმა.

როგორც პროკურატურაში აცხადებენ, ალექსანდრე ბატიაშვილი აწერს ხელს თავდაცვის უწყებასა და კომპანია „სილქნეტს“ შორის გაფორმებულ ხელშეკრულებას. როგორც საგამოძიებო უწყებაში აცხადებენ, დაკითხვისას სწორედ ბატიაშვილის „სილქნეტის“ კომერციულ დირექტორთან, ბაჩო ცინცალაძესთან, ნათესაურ კავშირზე გამახვილდება ყურადღება.