იუსტიციის მინისტრი თავდაცვის სამინისტროს მაღალჩინოსნების დაკავების ფაქტს გამოეხმაურა. მისი თქმით, ალასანიას უწყებაში მომხდარის გამო დაირღვა ძალოვან სტრუქტურებში არსებული დაუწერელი წესი, რაც ძალოვნების მხრიდან მინისტრის პატივისცემას გულისხმობს.

„ყველა გამომძიებელს და პროკურორს უნდა ესმოდეს, რომ როდესაც მინისტრი მივლინებაშია წასული, თუ გადაუდებელი აუცილებლობა არ არის, უნდა დაელოდოს მას, სანამ მისი უწყების თანამშრომლებს დააკავებენ. იმით, რაც მოხდა, დაირღვა ძალოვან სტრუქტურებში ის დაუწერელი წესი, რაც ძალოვნების მხრიდან მოქმედი მინისტრის პატივისცემას გულისხმობს. ყველა მინისტრი პატივს სცემს ძალოვნებს და მათგან იმავეს მოითხოვს“, - განაცხადა წულუკიანმა.

რაც შეეხება გამოძიების მიმდინარეობას, წულუკიანის თქმით, პროცესი უნდა იყოს გამჭვირვალე.

„გამჭვირვალეობისთვის ძალიან მნიშვნელოვანია, რომ საქმის უმთავრეს ნაწილებს მაინც მოეხნას საიდუმლო „გრიფი“, რადგან დღეს არავის მასალებსა და გარემოებებზე ხელი არ მიგვიწვდება“, - განაცხადა წულუკიანმა.