ჟვანიას გარდაცვალების მიზეზი: სიმართლე, რომელიც შესაძლოა მძიმე მოსასმენი აღმოჩნდეს

პოლიტიკა - 23:42, 01 Nov, 2014

33887

ზურაბ ჟვანიას დაცვის უფროსი და დაცვის წევრი კობა ხარშილაძე და მიხეილ ძაძამია სამსახურეობრივი გულგრილობის ბრალდებით წინასწარ პატიმრობაში იმყოფებიან. კობა ხარშილაძის ადვოკატის ბექა ბასილაიას განცხადებით „კობა ხარშილაძე და მიხეილ ძაძამია , ზურაბ ჟვანიას დაცვის ყოფილი უფროსი და ყოფილი წევრი, თავს ცნობენ აბსოლუტურად უდანაშაულოდ და ამის დამადასტურებლად, ჩვენ ვთხოვთ ნაფიც მსაჯულთა სასამართლოს. ნაფიც მსაჯულთა სასამართლო იქნება გარანტია იმისა, რომ საზოგადოებამ ერთხელ და სამუდამოდ გაიგოს სიმართლე, ის სიმართლე რომელიც შეიძლება საკმაოდ მძიმე მოსასმენიც აღმოჩნდეს, თუმცა საქმისადმი არსებული მაღალი საჯარო ინტერესიდან გამომდინარე, ჩვენ ამ სიმართლის თქმისგან თავს არ შევიკავებთ. ეს სიმართლე ითქმება" -აცხადებს ბასილაია.

„განსხვავებული აქცენტების“ ინფორმაციით, სიმართლე, რომლის გამჟღავნებასაც ადვოკატები აპირებენ „ეფბეაი“-ს დასკვნის ის ნაწილია, რომელზეც წინა ხელისუფლება შეგნებულად არ საუბრობდა და ახალი ხელისუფლებაც ასაიდუმლოებს.

ამ დასკვნასთან დაკავშირებით ყოფილი ხელისუფლების წარმომადგენლებმა რამდენიმე ხნის წინ კომენტარი გააკეთეს .

საქართველოს ყოფილი პრეზიდენტის მიხეილ სააკაშვილის განცხადებით, მათ დასკვნის ნაწილი შეგნებულად არ გამოაქვეყნეს:

„ოჯახი ამ დასკვნას იცნობს, ჩვენ ეს დასკვნა არ გამოვაქვეყნეთ გარკვეული მიზეზების გამო, ჩემთვის ზურაბის სახელი იყო წმინდათწმინდა და თუ ვინმესთვის ეს ასე არ არის, მათ შორის ოჯახის წევრების, მათ სინდისზე იყოს“ - განაცხადა სააკაშვილმა.

ყოფილი მთავარი პროკურორი მურთაზ ზოდელავა კი აღნიშნულ დასკვნასთან დაკავშირებით აცხადებდა: „ჩვენ პატივი ვეცით სახელმწიფოს, თანამდებობის პირი იყო ეს ადამიანი და ეს დელიკატური მომენტები რაც იქ იყო, მივიჩნიეთ, რომ იყო უფრო მნიშვნელოვანი, ვიდრე ის ჭორებისგან გამოწვეული ზიანი კონკრეტული მმართველი გუნდისთვის. ეს იყო კონსენსუსი. თუ დღევანდელი პოლიტიკური გუნდი გადაწყვეტს, რომ ეს საქმე გახდეს საჯარო, ეს მათი არჩევანია, მათ ხელეწიფებათ აიღონ ეს საქმე და გაასაჯაროონ, ჩვენი არჩევანი იყო ის რაც იყო და მიმაჩნია, რომ ის იყო სწორი, მიუხედავად იმისა, რომ გარკვეულწილად დავზიანდით“.