ქდმ-ს ყრილობამ თავმჯდომარედ გოჩა ჯოჯუა აირჩია და ნინო ბურჯანაძეს გაემიჯნა

პოლიტიკა - 21:13, 01 Nov, 2014

5746

როგორც ყრილობაზე განაცხადეს, ,,ქრისტიან-დემოკრატიული მოძრაობა“ "ნინო ბურჯანაძე - დემოკრატებს" ემიჯნება და იმ გადაწყვეტილებას აპროტესტებს, რომლის მიხედვით, მათი თქმით, 6 მაისს არალეგიტიმურად ჩატარებულ ყრილობაზე ნინო ბურჯანაძე პარტიის თავმჯდომარედ აირჩიეს.

ყრილობამ დღეს პარტია ახალ თავმჯდომარედ გოჩა ჯოჯუა აირჩია. როგორც გოჩა ჯოჯუამ განახადა, ,,ქრისტიან-დემოკრატიული მოძრაობის“ ყრილობას 210 დელეგატი ესწრებოდა და მისი ლეგიტიმურობა კითხვის ნიშნის ქვეშ ვერ დადგება.

,,დაახლოებით 15-16 ადამიანია, რომელიც ნინო ბურჯანაძესთან ერთად აღმოჩნდა, დანარჩენი აქ არიან წარმოდგენილი ყველა რაიონული ორგანიზაციის დელეგაცია, 210 დელეგატი სულ. ეს ადამიანები სწორედ თავისი ღირსების აღდგენას აპირებენ“ - განაცხადა გოჩა ჯოჯუამ.

ყრილობის მონაწილეებმა კიდევ ერთხელ გააკრიტიკეს „ქრისტიან დემოკრატიული მოძრაობის“ იმ რამდენიმე წარმომადგენლის არაადეკვატურ საქციელი, რომლებმაც „ქრისტიან-დემოკრატიული მოძრაობა“ არაკანონიერად გადაუფორმეს „გაერთიანებული დემოკრატების“ თავმჯდომარეს ნინო ბურჯანაძეს. ,,ყრილობა გაემიჯნება ასევე „გაერთიანებული დემოკრატების“ თავმჯდომარის ნინო ბურჯანაძის საგარეო პოლიტიკურ კურს, რამდენადაც ამ ყრილობის მესვეურები საქართველოს მომავალს ევროატლანტიკურ სივრცეში ხედავენ და არა ევრაზიულ კავშირში“, - განაცხადეს ყრილობაზე პარტიის წევრებმა.

,,ქრისტიან-დემოკრატიული მოძრაობის“ ყრილობა, თავმჯდომარის გარდა მთავარი კომიტეტი აირჩია.

დღევანდელი ყრილობა შეაფასა გიორგი ახვლედიანმა, რომელმაც დღეს შეკრებილებს პარტიის მცირე ჯგუფს უწოდებს და ამბობს, რომ ამ შეკრებას და მასზე მიღებულ გადაწყვეტილებას არც ლეგიტიმურობა და არც იურიდიული ძალა არა აქვს.