გერმანიიდან დაბრუნებულმა თავდაცვის მინისტრმა, აეროპორტში ჟურნალისტებთან თავდაცვის უწყების თანამშრომლების დაკავებაზე ვრცლად ისაუბრა და საკუთარი თანამშრომლების დანაშაულში მონაწილეობა გამორიცხა. ირაკლი ალასანია საქმეზე გრიფის მოხსნას და ღია და გამჭვირვალე გამოძიებას ითხოვს.

„მთავარი რაზეც კონცენტრირებული ყველა და საზოგადოება , არის ის რომ ყველა შეკითხვას გაეცეს პასუხი, ამას ჭირდება, რა თქმა უნდა განჭვირვალე გამოძიება, მე დარწმუნებული ვარ ჩემი თანამებრძოლების და თანამშრომლების სრულ უდანაშაულობაში, მე ვაკვირდებოდი ბუნებრივია შესყიდვების პროცესს, ვიცი რომ ყველაფერი კანონთან სრულ შესაბამისობაშია, თუმცა რადგანაც შეკითხვები გაუჩნდა ვიღაცას, ამას უნდა გაეცეს პასუხი და მთელი თავდაცვის სამინისტრო მოწადინებულია, რომ ითანამშრომლოს გამოძიებასთან და საზოგადოებამდე მივიდეს სრული ჭეშმარიტება“-განაცხადა თავდაცვის მინისტრმა.

ირაკლი ალასანიას თქმით, იმის გამო რომ პროცესი დახურულად წარიმარტა არსებობს იმის წინაპირობა და ელემენტები, რომ მისი თანამშრომლები სამართლებრივად დაიჩაგრონ:

„ჩემთვის მნიშვნელოვანია , რომ ჩვენმა ბიჭებმა იგრძნონ თავი დაცულად სამართლებრივად და მე მთელ ყურადღებას გადავიტან იქითკენ, რომ მათ თავი არ იგრძნონ დაჩაგრულად, ამის ელემენტები და წინაპირობები სამწუხაროდ უკვე ჩანს, ისე წარიმართა პროცესი დახურულად .“

ალასანია აცხადებს, რომ ქვეყნის უსაფრთხოებამ უკვე განიცადა დარტყმა ამ ნაბიჯით:

„ძალიან მნიშვნელოვანია რომ საიდუმლო გრიფი მოეხსნას ამ საქმეს იმიტომ რომ უსაფრთხოების კუთხით უკვე დიდი ხანია დარტყმა მიიღო ქვეყანამ ამ ნაბიჯით, აქედან გამომდინარე იმ რაღაც მომენტების საიდუმლოდ შენახვას, რომელიც თავის დროზე აუცილებელი იყო, ახლა მნიშვნელობა აღარ აქვს, ამიტომ სრული ჭეშმარიტებისთვის დადგენისთვის მთავარია წარიმართოს ღიად , გახსნილად გამოძიება“

აღნიშნულ საკითხთან დაკავშირებით, თავდაცვის მინისტრი ხელისუფლების ყველა შტოსთან შეხვედრას გეგმავს:

„ვინაიდან ჩვენი ქვეყნის უსაფრთხოებას ამით მიადგა ზიანი, მნიშვნელოვანია ისიც, რომ შედგეს უმაღლეს პოლიტიუკურ დონეზე დისკუსიები ამასთან დაკავშირებით, მე დაგეგმილი მაქვს საქართველოს მთავრობის წევრებთან შეხვედრა, პრემიერ მინისტრთან, პრეზიდენტთან და პარლამენტის თავმჯდომარესთან, შესაბამის საპარლამენტო კომიტეტებთან.“

ალასანია იმ პირების პასუხისმგებლობაზეც საუბრობს ვინც საზოგადოება შეცდომაში შეიყვანა, ხოლო საქმის შესაძლო პოლიტიკური სარჩულზე საუბარს მომავალში გეგმავს:

„ ბუნებრივია, როდესაც ყველაფერი დასრულდება ჩვენ ყველაფერს თავის სახელს დავარქმევთ და პასუხისმგებლობა უკვე დადგება იმ პირების ვინც შესაძლო შეცდომაში შეიყვანა საზოგადოება .

გამოძიებას არავინ და არაფერი წინ არ უნდა აღუდგეს, სრული ჭეშმარიტება უნდა დადგინდეს, რაც შეეხება ამას აქვს თუ არა პოლიტიკური სარჩული ამაზე მოგვიანებით ვილაპარაკებთ.“- განაცხადა ირაკლი ალასანიამ.