„ახალი მემარჯვენეები“ პრეზიდენტის ვეტოს მიესალმებიან

პოლიტიკა - 15:29, 31 Oct, 2014

1399

„პოლიტიკური გაერთიანება „ახალი მემარჯვენეები“ მიესალმება პრეზიდენტ გიორგი მარგველაშვილის მიერ პერსონალურ მონაცემებზე წვდომის ე.წ. გასაღების მექანიზმების თაობაზე საკანონმდებლო ცვლილებების განხორციელების ვადის გადაწევასთან დაკავშირებით პარლამენტის მიერ მიღებულ კანონზე ვეტოს დადების ფაქტს.

ქართული არასამთავრობო სექტორი, პოლიტიკური ოპოზიციის უდიდესი ნაწილი, საერთაშორისო საზოგადოება მოუწოდებდა საქართველოს ხელისუფლებას, რომ წერტილი დაესვა საქართველოს მოქალაქეების პერსონალურ მონაცემებთან წვდომის მახინჯი, ადამიანის ფუნდამენტური უფლების შემლახავი პრაქტიკისთვის. საქართველოს პარლამენტის მიერ შესაბამისი ნორმების დამდგენი კანონის მიღების გადავადება საფძველშივე ეწინააღმდეგება ამ სულისკვეთებას.

პარლამენტის მიერ მიღებულ კანონზე საქართველოს პრეზიდენტის მიერ ვეტოს დადებამ კარგად გამოაჩინა რამდენად დიდი მნიშვნელობა აქვს დემოკრატიისთვის ისეთი მნიშვნელოვანი ინსტიტუციის, როგორც პრეზიდენტის ინსტიტუტია, დამოუკიდებლობას, მისი მხრიდან ადამიანის უფლებათა დაცვის გარანტიების უზრუნველყოფას, სახელისუფლებო შტოთა შორის კონფლიქტის, ან არასწორად, ქვეყნის საზიანოდ მიღებული გადაწყვეტილებების მიღების შემთხევავში პრეზიდენტის, როგორც მიუმხრობელი არბიტრის, ფუნქციის სწორად შესრულებას.

გვინდა მოვუწოდოთ საქართველოს პარლამენტს ამჯერად მაინც ნუ ეცდებიან პრეზიდენტის ვეტოს დაძლევას და დროულად უზრუნველყონ საკანონმდებლო ცვლილებების მიღება ქვეყანაში პირადი ცხოვრების ხელშეუხებლობის დაცვის მყარი გარანტიებისა და მექანიზმების უზრუნველსაყოფად.

იმედი გვინდა ვიქონიოთ, რომ ეს ფაქტი პოზიტიურ როლს შეასრულებს ქვეყნის დემოკრატიულ განვითარებაში და სამუდამოდ აღმოფხვრის ადამიანის პირად ცხოვრებაში უკანონოდ ჩარევის, ფარული მოსმენის და მიყურადების მავნე პრაქტიკას, რომელიც წლების მანძილზე მიმართული იყო ქვეყანაში პიროვნების თავისუფლების გარანტიის უზრუნველყოფის საწინააღმდეგოდ“, - ნათქვამია პარტიის მიერ გავრცელებულ განცხადებაში.