უმრავლესობის წევრი ზაქარია ქუცნაშვილი უპასუხისმგებლოს უწოდებს პრეზიდენტის გადაწყვეტილებას, რომლის მიხედვით გიორგი მარგველაშვილმა ფარულ მოსმენებთან დაკავშირებით პარლამენტის მიერ მხარდაჭერიილ კანონპროექტს ვეტო დაადო.

ამის შესახებ ქუცნაშვილმა „ნიუპოსტთან“ საუბარში განაცხადა.

„პრეზიდენტის ამ გადაწყვეტილებას არ ველოდი. ამ გადაწყვეტილებას ვუწოდებდი მცდარს და უპასუხისმგებლო გადაწყვეტილებას. მისი არგუმენტაცია ჩემთვის მიუღებელია. შეუძლებელია დაძლეული იქნას ეს ვეტო შაბათ-კვირა, კანონი კი ძალაში ხვალ შედის. რაც შეეხება პროცედურებს, პრეზიდენტის მხრიდან გადაგზავნილ კანონპროექტს დაედო ვეტო, პარლამენტს შეუძლია დაძლიოს ეს ვეტო. ამ შემთხვევაში პარლამენტის მიერ მიღებული კანონი იქნება მიღებული, ხოლო თუ პარლამენტი ვეტოს ვერ დაძლევს ძალაში დარჩება პრეზიდენტის ვეტო“, - განაცხადა ქუცნაშვილმა.

პრეზიდენტმა ფარულ მოსმენებთან დაკავშირებით პარლამენტის მიერ გუშინ მიღებულ კანონპროექტს ვეტო დაადო.

ფარული მოსმენების შესახებ კანონპროექტის განხილვის გადავადების შესახებ შესაბამისი კანონპროექტი პარლამენტმა გუშინ მიიღო. განხილვის გადავადებას მხარი 65-მა დეპუტატმა დაუჭირა, ხოლო მოწინააღმდეგე 31 იყო.

რამდენად შეძლებს საკანონმდებლო ორგანო ვეტოს დაძლევას, უცნობია. პრეზიდენტის ვეტოს დასაძლევად პარლამენტს 92 ხმა ჭირდება.