პრემიერ-მინისტრს ახალი თანაშემწე ჰყავს. ადამიანის უფლებების და გენდერული თანასწორობის მიმართულებით ირაკლი ღარიბაშვილის მრჩეველი სოფო ჯაფარიძე იქნება.

სასჯელაღსრულების მინისტრის ყოფილი მოადგილე ახალ თანამდებობაზე მუშაობას 10 ნოემბრიდან შეუდგება. „ნიუპოსტმა“ სოფო ჯაფარიძესთან ექსკლუზიური ინტერვიუ ჩაწერა.

სოფო ჯაფარიძე სხვადასხვა არასამთავრობო და საერთაშორისო უწყებებში მოღვაწეობდა. მათ შორის, „საქართველოს ახალგაზრდა იურისტთა ასოციაციაში“ და ლონდონში „ადამიანის უფლებათა დაცვის საერთაშორისო ცენტრში“.

როგორც ჩვენთან საუბარში პრემიერის ახალი მრჩეველი ამბობს, შეთავაზება თავად ირაკლი ღარიბაშვილისგან მიიღო და გადაწყვეტილების მიღებამდე საკმაოდ ბევრი იფიქრა.

„შემოთავაზება პრემიერ-მინისტრისგან წამოვიდა. გადაწყვეტილება ერთი კვირის წინ მივიღე. თუმცა სანამ გადაწყვეტილებას მივიღებდი, ძალიან ბევრი ვიფიქრე, რადგან საკმაოდ საპასუხისმგებლო პოსტია და მინდოდა კარგად გააზრებული გადაწყვეტილება ყოფილიყო. ჩემი პოზიცია იქნება პრემიერ-მინისტრის მრჩეველი ადამიანის უფლებების და გენდერული თანასწორობის მიმართულებით. პირადად, მე ვთვლი, რომ მნიშვნელოვანი და ნაკლებად მნიშვნელოვანი უფლებები არ არსებობს. დარღვევის შემთხვევაში უნდა მოხდეს თანაბარი რეაგირება. უბრალოდ კონკრეტული მოცემულობიდან გამომდინარე, შესაძლებელია რომელიმე საკითხი მეტ ყურადღებას იმსახურებდეს და თავისი სიმწვავით მეტ მობილიზებას საჭიროებდეს. მაგალითად, ქალთა წინააღმდეგ ძალადობას. თუ რომელიმე საკითხი ჩემი მხრიდან მეტ ყურადღებას საჭიროებს, მეტ ყურადღებას დავუთმობ, იმ მომენტისთვის. თუმცა ის, რომ ერთი უფლება მეორესგან გამოვყო, ასეთ რამეს არ ვაპირებ. მე ასევე ჩამბარდა ოჯახური ძალადობის წინააღმდეგ საბჭოს თავმჯდომარეობა. შესაბამისად, ამ მიმართულებით აქტიურად ვიმუშავებ“, - აცხადებს სოფო ჯაფარიძე.

კითხვაზე, თუ რატომ დატოვა სასჯელაღსრულების მინისტრის მოადგილის პოსტი, სოფო ჯაფარიძე პასუხობს, რომ „იქ საკუთარი თავი ამოწურა“. მისი თქმით, პროფესიული თვალსაზრისით მეტი მრავალფეროვნება სჭირდებოდა და ახალი პოსტი ამის საშუალებას იძლევა.

„სასჯელაღსრულების სამინისტროდან წამოვედი რადგან, მიმაჩნია, რომ იქ ჩემი თავი ამოვწურე. არ მინდა ეს გაგებული იქნეს, როგორც თამამი განცხადება იმ თვალსაზრისით, რომ ხალხი წლების განმავლობაში მუშაობს ერთ თანამდებობაზე, მაგრამ ასეთ განცხადებას არ აკეთებს. უბრალოდ, ჩავთვალე, რომ პროფესიული დიაპაზონის თვალსაზრისით მეტი მრავალფეროვნება მჭირდებოდა და ეს პოსტი ამის საშუალებას მომცემს“, - აცხადებს ჯაფარიძე.

პრემიერის ახალი მრჩეველი ამბობს, რომ მისი მუშაობის პრინციპი ღიაობაა და შესაბამისად, მედიასთან შეძლებისდაგვარად კონტაქტური იქნება.

„მედიასთან კონტაქტური ვიქნები შესაძლებლობის ფარგლებში. ზოგადად, ჩემი მუშაობის პრინციპია ღიაობა და გამჭირვალობა, მაგრამ ზოგჯერ ისე გამოდის, რომ ამის ხარჯზე ძირითადი საქმის კეთება ღამის 2 საათამდე მიწევს. ისე უნდა გავანაწილო, რომ არც მედია გავანაწყენო და არც თავი გადავიტვირთო ისე, რომ ეს ჩემი მუშაობის ხარისხზე აისახოს“, - აცხადებს ჯაფარიძე.