ექსპერტი ლევან ალაფიშვილ პარლამენტის თავმჯდომარის განცხადებას ეხმაურება, სადაც დავით უსუფაშვილი ამბობს, რომ თავდაცვის უწყების მოვლენებს პოლიტიკური პასუხისმგებლობის საკითხი უნდა მოჰყვეს.

როგორც „ნიუპოსტთან“ საუბარში ალაფიშვილი განმარტავს, უსუფაშვილის განცხადებაში ადრესატების წრე ფართოა და შესაძლოა იქ ირაკლი ალასანიაც იგულისხმებოდეს.

„დავით უსუფაშვილის განცხადება ფართო ინტერპრეტაციის საშუალებას იძლევა, იმდენად ფართოა, რომ ალასანიასაც მოიცავს. შესაძლებელია სხვებსაც გულისხმობდეს, მაგალითად მის პოლიტიკურ გუდს, მხარდამჭერებს თუ სხვებს“, - აცხადებს ალაფიშვილი.

თავად ექსპერტი მიიჩნევს, რომ ამ შეთხვევაში, როდესაც გამოძიება საწყის ეტაპზეა, მიმინისტრის პასუხისმგებლობაზე საუბარი ნაჩქარევი და გადაჭარბებულია.

„პირველ რიგში ყველას მივმართო თხოვნით, რომ ცოტა თბილად მოვეკიდოთ იმ თემატიკას, რომელიც ჩვენს ჯარისკაცებთანაა დაკავშირებული. ეს არის ერთადერთი სახელმწიფო ინსტიტუტი, რომელიც მუდმივად საზოგადოების მაღალი ნდობით სარგებლობს. ყველამ პატივი უნდა ვცეთ უდანაშაულობის პრეზუმფციას. თავად ფაქტი არის მძიმე. თუმცა ეს ფაქტი არის იმ დონეზე მტკიცებულებებით გამაგრებული, რაც გამოძიების საწყისი ეტაპისთვის შეიძლება იყოს საკმარისი. ჩვენ არ ვიცით შემდგომში იქნება თუ არა უფრო მყარი მტკიცებულებები. თუ ამ ყველაფერზე პოლიტიკურ კონტექსტში ვიმსჯელებთ, ვფიქრობ, არასწორია სასამართლო განხილვების დაწყებამდე მაინც შეფასებების გაკეთება. შესაძლებელია, მთავრობის შიგნით მოჰყვეს რაღაც ტიპის შეფასებები, მაგრამ ამ ტიპის საჯარო პოლიტიკური განცხადებები არასწორია. შესაძლებელია პასუხისმგებლობის საკითხი თავდაცვის სამინისტროში დადგეს, მაგრამ ეს მთავრობის კომპეტენციაა შიგნით როგორ წარმართავენ ამ ყველაფერს. ამ შემთხვევაში ხელმძღვანელის პასუხისმგებლობის კონტექსტში ამ საკითხის დაყენება ამ ეტაპზე გადაჭარბებული და ნაჩქარევია“, - აცხადებს ალაფიშვილი.

პარლამენტის თავმჯდომარის დავით უსუფაშვილის განმარტებით, იმ შემთხვევაში, თუ დაკავებულების ბრალეულობა დამტკიცდა, ამ ყოველივეს სერიოზული პოლიტიკური პასუხისმგებლობა უნდა მოჰყვეს.

ცოტა ხნის წინ, თავდაცვის სამინისტროს მაღალჩინოსნებს სასამართლომ პატიმრობა შეუფარდა.