სოფო ჯაფარიძე, პრემიერის მრჩევლის რანგში პირველ კომენტარს ფარულ მიყურადებასთან დაკავშირებით აკეთებს. ჯაფარიძე აცხადებს, რომ ამ დროისათვის მიმდინარეობს მსჯელობა ერთობლივ პოზიციაზე შეჯერებასთან დაკავშირებით. ჯაფარიძე პრემიერმინისტრმა საკუთარ მრჩევლად ადამიანის უფლებათა და გენდერული თანასწორობის საკითხებში, დღეს წარადგინა:

„მექანიზმთან დაკავშირებით ისევ მიმდინარეობს მსჯელობა, ზუსტად ეს გახდა გადავადების მიზეზი, იმიტომ, რომ კონკრეტული პოზიცია უნდა ჩამოყალიბდეს, უფრო მეტად ინტენსიური მუშაობის შედეგად. ამიტომ არის სურვილი, შეთანხმდნენ ისეთ ოპტიმალურ ვარიანტზე, რომელიც მისაღები იქნება ადამიანის უფლებათა დაცვის სტანდარტებიდან გამომდინარე".

სახალხო დამცველის, უჩა ნანუაშვილის განცხადებით კი ე.წ. გასაღები მხოლოდ შინაგან საქმეთა სამინისტროს არ უნდა ჰქონდეს:

„მხოლოდ შინაგან საქმეთა სამინისტროს არ უნდა ჰქონდეს გასაღები. შესაბამისად, ე.წ. კომპრომისული ვარიანტი, როგორც შინაგან საქმეთა სამინისტროს, ასევე კონკრეტულ ოპერატორ კომპანიას თუ ექნება ეს გასაღები, კარგი იქნება“, - განაცხადა უჩა ნანუაშვილმა.