ექსპერტი რამაზ საყვარელიძე IPM-ის მიერ გამოქვეყნებულ კვლევას ეხმაურება, რომლის მიხედვით საქართველოში 66% სიღარიბეში ცხოვრობს, მდიდარი კი მხოლოდ 5%-ია.

როგორც „ნიუპოსტთან“ საუბარში საყვარელიძე განმარტავს, კვლევის შედეგად მიღებული მაჩვენებელი მძიმეა.

მისი თქმით, იმისათვის, რომ სახელმწიფომ უმუშევრობა დაძლიოს პირველ რიგში სამუშაო ადგილები უნდა შექმნას.

„კვლევის შედეგად გამოქვეყნებული მაჩვენებელი ძალიან მძიმეა. რაც შეეხება იმას თუ რა უნდა გააკეთოს ხელისუფლებამ. არაერთხელ თქმულა, რომ ამისთვის აუცილებელია, პირველ რიგში, სამუშაო ადგილების შექმნა. ნებისმიერ ქვეყანაში ხელისუფლება უკმაყოფილოა, როდესაც 5% და ცოტა მეტი მოსახლეობისა უმუშევარია. ჩვენთან ეს მაჩვენებლი გაცილებით დიდია. ასე, რომ საკვანძო სიღარიბის დაძლევაში სამუშაო ადგილების არსებობაა“, - აცხადებს საყვარელიძე.

კომპანია IPM-ის მიერ გამოქვეყნებული კვლევის მიხედვით საქართველოში 66% სიღარიბეში ცხოვრობს, მდიდარი კი მხოლოდ 5%-ია.

კომპანია „აიფიემმა“ ამ ამოცანის შესასრულებლად გამოიყენა „სოციო-ეკონომიკური სტატუსის“ (SES) მოდელი. (SES) მოდელის მიხედვით, საზოგადოება იყოფა სამ ფენად: 1. მაღალი სოციალური კლასი, რომელთაც შესაძლებლობა აქვთ გააკეთონ ისეთი შენაძენი, როგორიციაა ავტომობილი, ბინა, გამოიტანონ სესხი და მიიღონ მრავალფეროვანი, ჯანსაღი და ნოყიერი საკვები; 2. საშუალო სოციალური კლასი, რომელთაც თვიდან თვემდე გააქვთ თავი საკუთარი შემოსავლით, აქვთ მატერიალური რესურსი კვებისთვის, მაგრამ თავს ვერ აძლევენ უფლებას გააკეთონ ძვირიანი შენაძენები; 3. დაბალი სოციალური კლასი, რომელთაც აქვთ კვების პრობლემა, მათ არ ყოფნით შემოსავალი საჭირო რაოდენობის საკვების მისაღებად და მუდმივად არიან გაუთვალისწინებელი პრობლემების მოლოდინში.