14 ოქტომბერს ლონდონის საერთაშორისო ურთიერთობების ინსტიტუტის Chatham House-ის მიწვევით შედგა შეხვედრა, რომელსაც ესწრებოდა აფხაზეთის დეფაქტო საგარეო მინისტრი ვიაჩესლავ ჩიკირბა. ამის შესახებ ინფორმაციას დეფაქტო აფხაზეთის საგარეო უწყება ავრცელებს.

როგორც უწყების ოფიციალურ საიტზე, 17 ოქტომბერს გამოქვეყნებულ ინფორმაციაშია ნათქვამი, ჩიკირბას გამოსვლის მთავარი თემა იყო აფხაზეთის, როგორც დამოუკიდებელი სახელმწიფოს განვითარების პერსპექტივები და კავკასიაში უსაფრთხოებასთან და სტაბულურობასთან დაკავშირებით ჟენევის მოლაპარაკებების პროცესის განხილვა.

შეხვედრას უძღვებოდა ჩეთამ ჰაუსის ერთერთი პროგრამის ”რუსეთი და ევრაზია”-ს ხელმძღვანელი ჯეიმს ნიკსი (James Nixey). მინისტრის გამოსვლამ დიდი ინტერესი გამოწვია დამსწრე საზოგადოებაში, რომელთა შორის იყვნენ დიპლომატები, პოლიტოლოგები, ექსპერტები კავკასიის საკითხში, ბრიტანეთის პრესის წარმომადგენლები, საერთაშორისო და კავკასიური არასამთავრობო ორგანიზაციები, ლონდონის კავკასიური დიასპორა, საქართველოს, თურქეთის, სომხეთის, უკრაინის, ბრაზილიის საელჩოების და ასევე ბრიტანეთის საგარეო უწყების წარმომადგენლები.

დე ფაქტო უწყების გამოქვეყნებული ინფორმაციის თანახმად, დასმული იქნა მრავალი კითხვა აფხაზეთის საგარეო და საშინაო პოლიტიკასთან დაკავშირებით, მათ შორის რუსეთ-აფხაზეთის და საქართველო-აფხაზეთის ურთიერთობებთან დაკავშირებით. საუბარი შეეხო რეგიონში მიმდინარე კონფლიქტებს და მათ გავლენას აფხაზეთზე, აფხაზეთის ეკონომიკურ და პოლიტიკურ ურთიერთობებს რეგიონის ქვეყნებთან, აფხაზეთის ეკონომიკური განვითარების პერსპექტივებს და სხვა საკითხებსაც.

შეხვედრაზე ხაზი გაესვა ბრიტანეთის საექსპერტო საზოგადოებისთვის და დიპლომატიური კორპუსისთვის საკვანძო საკითხებზე აფხაზეთის ხელმძღვანელობის პოზიციების გაცნობის მნიშვნელობას.