ექსპერტი თორნიკე შარაშენიძე IPM-ის მიერ გამოქვეყნებულ კვლევას ეხმაურება, რომლის მიხედვით საქართველოში 66% სიღარიბეში ცხოვრობს, მდიდარი კი მხოლოდ 5%-ია.

როგორც „ნიუპოსტთან“ საუბარში შარაშენიძე აცხადებს, სახელმწიფო სიღარიბის დაძლევას მხოლოდ სოციალური პროგრამებით არ უნდა ცდილობდეს. მისი თქმით, თუ მთავრობას სურს, რომ ქვეყანაში სიღარიბე დაძლიოს, უნდა გაჯანსაღდეს ეკონიმიკა.

„როგორც ვიცი სიღარიბეში მცხოვრებთა რიცხვი 66%-ია. ეს სიტუაცია დიდი ხანია არ იცვლება. მხოლოდ თავისუფალი ბაზარი ვერ არეგულირებს ამას, საჭიროა სახელმწიფოს მხრიდან აქტიური ჩარევა, რომ სიღარიბე დაძლეული იქნას. თუმცა სიღარიბის დაძლევა, როგორც ჩანს, ხდება ისეთი ზომებით, როგორიც არის ერთჯერადი დახმარების გაცემა სოციალურ პროგრამებზე. ამას სჭირდება სერიოზული მუშაობა მოსახლეობის განათლებაზე და სჭირდება სერიოზული მუშაობა იმისთვის, რომ სახელმწიფომ განახორციელოს მსხვილმასშტაბიანი პროექტები, რომელიც წვრილ ბიზნესს წაახალისებს. ერთჯერადი დახმარებებით არაფერი გამოდის. თუ ეკონომიკა არ გაჯანსაღდება, სიღარიბე ვერ დაიძლევა. სოციალური პროგრამები სიღარიბეს ვერ ძლევს“, - აცხადებს შარაშენიძე.

კომპანია IPM-ის მიერ გამოქვეყნებული კვლევის მიხედვით საქართველოში 66% სიღარიბეში ცხოვრობს, მდიდარი კი მხოლოდ 5%-ია.

კომპანია „აიფიემმა“ ამ ამოცანის შესასრულებლად გამოიყენა „სოციო-ეკონომიკური სტატუსის“ (SES) მოდელი. (SES) მოდელის მიხედვით, საზოგადოება იყოფა სამ ფენად: 1. მაღალი სოციალური კლასი, რომელთაც შესაძლებლობა აქვთ გააკეთონ ისეთი შენაძენი, როგორიციაა ავტომობილი, ბინა, გამოიტანონ სესხი და მიიღონ მრავალფეროვანი, ჯანსაღი და ნოყიერი საკვები; 2. საშუალო სოციალური კლასი, რომელთაც თვიდან თვემდე გააქვთ თავი საკუთარი შემოსავლით, აქვთ მატერიალური რესურსი კვებისთვის, მაგრამ თავს ვერ აძლევენ უფლებას გააკეთონ ძვირიანი შენაძენები; 3. დაბალი სოციალური კლასი, რომელთაც აქვთ კვების პრობლემა, მათ არ ყოფნით შემოსავალი საჭირო რაოდენობის საკვების მისაღებად და მუდმივად არიან გაუთვალისწინებელი პრობლემების მოლოდინში.