„ნაციონალური მოძრაობის“ ერთ-ერთი ლიდეირი, ზურაბ ჭიაბერაშვილი მიიჩნევს, რომ ხელისუფლებამ მოსმენებთან დაკავშირებით არასამთავრობოების პოზიცია უნდა გაითვალისწონოს.

როგორც „ნიუპოსტთან“ საუბარში ჭიაბერაშვილმა განაცხადა, ირაკლი ღარიბაშვილის ინტერესია, რომ გასაღები სამინისტროში დარჩეს.

„დღეს არსებული სისტემა ხელისუფლებას ჩვენი პერიოდიდან გადმოჰყვა და რა თქმა უნდა სამართლიანი იყო და რჩება ის კრიტიკა, რომ ეს სისტემა ნაკლოვანია.ნაკლოვანია ორივე მიმართულებით. ერთი, რომ საზოგადოებას არ აქვს მყარი გარანტია იმის, რომ რომელიმე ჩინოსანი ამას არ გამოიყენებს მოქალაქის პირადი ხელშეუხებლობის დასარღვევად და მეორე, ეხლანდელი სისტემა ჩვენს სახელმწიფოებრივ თავდაცვასაც არ უზრუნველყოფს".

როგორც ჭიაბერაშვილი ამბობს თუ ე.წ. მოსმენების გასაღები, სამინისტროს ხელში დარჩება, მოსახლეობის პირადი ინფორმაციის ხელშეუხებლობას გარე საფრთხეც დაემუქრება. "არსებული სისტემა ტოვებს საშუალებას, რომ ჩვენი სამართალდამცველი სტრუქტურები სულაც რომ კანონის მიხედვით მოიქცნენ, შეიძლება ვიღაც სხვა, ჩვენი ოკუპანტი ქვეყნის სპეცსამსახურებმა ისარგებლონ არსებული სისტემით, რადგან ჩვენი პირადი მონაცემები არ არის სათანადოდ დაცული", განაცხადა "ნიუპოსტთან" საუბრისას ნაციონალების ლიდერმა.

"იმისათვის, რომ ორივე მიმართულებით მოხდეს დაახლოება იმ სისტემასთან, რაც არის აპრობირებული თუნდაც ევროპაში, ამისთვის აუცილებელია, რომ ხელისუფლებამ გაითვალისწინოს ის მოთხოვნები, რასაც არასამთავრობო ორგანიზაციები აყენებენ. ღარიბაშვილის განცხადება უნდა განვიხილოთ როგორც მისი პირადი ინტერესი, რომ შეინარჩუნოს პოლიტიკური ზეგავლენა ამ სისტემაზე. ის ლაპარაკობს დეპოლიტიაზციაზე, როდესაც სწორედ მის ხელში მოხდა სამართალდამცველების სრული პოლიტიზაცია და ამავდროულად ჩვენ აშკარად ვხედავთ, რომ მიმდინარეობს „ნაციონალური მოძრაობის“ დევნა და ჩვენ გვაქვს ეჭვი რომ ამ სისტემას ნაციონალური მოძრაობის წინააღმდეგ იყენებს. საზოგადოებამ უნდა გაიაზროს თუ რამდენად მნიშვნელოვანია ის წინადადება, რომელსაც არასამთავრობები აყენებენ და მოახდინოს ზეწოლა ხელისუფლებაზე, რომ მათ მიიღონ არსებული ცვლილებები“, - განაცხადა ჭიაბერაშვილმა.