უმრავლესობის წევრი ლევან ბერძენიშვილი არ ეთანხმება პრემიერ-მინისტრის მოსაზრებას, რომ მოსმენების გასაღები სამინისტროში უნდა დარჩეს.

როგორც „ნიუპოსტთან“ საუბარში ბერძენიშვილმა განაცხადა, ის ეთანხმება არასამთავრობოების განცხადებას, რომ გასაღები სულ ცოტა ორ ადგილას უნდა იყოს იმისთვის, რომ კონტროლის მეტი საშუალება არსებობდეს.

„ეს პარლამენტის გადასაწყვეტი საკითხია. თუმცა, პირადად მე სწორი მგონია ის, რასაც არასამთავრობო სექტორი ამბობს, რომ გასაღები სულ ცოტა ორ ადგილას უნდა იყოს იმისათვის, რომ კონტროლის საშუალება არსებობდეს. ამაზე სხვადასხვა მოსაზრება არსებობს. ეს არის ჩვეულებრივი სამსჯელო საკითხი. მე მიმაჩნია, რომ ევროპული გზით თუ მივდივარ გასაღები შინაგან საქმეთა სამინისტროს ხელში არ უნდა იყოს“, - განაცხადა ბერძენიშვილმა.

პრემიერ-მინისტრის თქმით, მოსმენების გასაღები სამინისტროს ხელში უნდა დარჩეს. ღარიბაშვილმა განმარტა თუ რატომ ეწინააღმდეგება ე.წ. გასაღების მობილური ოპერატორების ხელში ყოფნას. მისი თქმით, სახელმწიფო ქვეყნის უსაფრთხოებას უცხოურ კომპანიებს ვერ ანდობს.