რუსეთსა და ცხინვალს შორის თანამშრომლობისა და ინტეგრაციის ხელშეკრულებასთან დაკავშირებით კომენტარები არასამთავრობო ორგანიზაცია „საქართველოს რეფორმების ასოციაციის“ წარმომადგენლებმა გააკეთეს. საქართველოს რეფორმების ასოციაცია (GRASS) მთავრობას ანტი-ანექსიური სტრატეგიის შემუშავებას სთავაზობს, რომელიც ორგანიზაციის განმარტებით, რამდენიმე მნიშვნელოვანი ელემენტისგან უნდა შედგებოდეს.

სერგი კაპანაძის განცხადებით, საქართველოს მთავრობამ რუსეთის წინააღმდეგ საერთაშორისო სასამართლოებში პროცესების წარმოება უნდა დაიწყოს:

„პირველი, რაც ამ ანტიანექსიური სტრატეგიის შემადგენელი ნაწილია, ეს არის საქართველოს მხრიდან სხვადასხვა საერთაშორისო სასამართლოებში რუსეთის წინააღმდეგ პროცესების მომზადება, ეს პროცესი თუ დღეს არ დაიწყო და ამ რეგიონების ანექსია მოხდა, შემდეგ უკვე ძალიან გვიან იქნება, პოლიტიკური შემზადება არის საჭირო დღესვე.“- აღნიშნა კაპანაძემ

ელენე ხოშტარიას აზრით, საქართველომ თავისი ქმედებები ევრაზიული კავშირის სივრცის აღდგენის პროცესის წინააღმდეგაც უნდა მიმართოს:

„ჩვენი ქმედებები უნდა იყოს მიმართული, არა უბრალოდ ამ ხელშეკრულების ჩაშლისაკენ, არამედ მთლიანად ამ ევრაზიული კავშირის სივრცის აღდგენის პროცესის წინააღმდეგ , ბუნებრივია ჩვენი ერთადერთი და მთავარი მეკავშირე არის საერთაშორისო თანამეგობრობა, ის სამართლებრივი დიპლომატიური ბერკეტები, რომლის გამოყენებაშიც ჩვენ ახალი ელემენტები დღეს უნდა შემოვიტანოთ“- განაცხადა ელენე ხოშტარიამ