„საქართველო, რომ მშვიდობისმოყვარე ქვეყანა ყოფილიყო, რუსეთთან ამ ფართომასშტაბიანი მოლაპარაკებების აუცილებლობა არ იქნებოდა“- განაცხადა აფხაზეთის დე ფაქტო საგარეო საქმეთა მინისტრმა ვიაჩესლავ ჩიკირბამ.

რუსეთსა და აფხაზეთს შორის ახალი ხელშეკრულების გაფორმების აუცილებლობა საქართველოს აგრესიული პოლიტიკის გამო გაჩნდა, ამის შესახებ აფხაზეთის დე ფაქტო ხელისუფლების საგარეო საქმეთა მინისტრმა ვიაჩესლავ ჩიკირბამ აფხაზეთის ტელევიზიის ეთერში განაცხადა.

„უსაფრთხოება სამხრეთ ფლანგზე აფხაზეთისთვის და რუსეთისთვის ძალიან მნიშვნელოვანია, ამასთან დაკავშირებით ჩვენ სრული ურთიერთგაგება გვაქვს, ჩვენ უნდა ვიმოქმედოთ ერთობლივად, რამდენადაც საქართველო გეგმავს ნატოში შესვლას და აშშ აქტიურად ლობირებს საქართველოს ჩრდილო-ატლანტიკურ ალიანსში გაწევრიანებას - განაცხადა ჩიკირბამ. მისი თქმით, ნატოს მრავალი მაღალჩინოსანი ჩადის საქართველოში, აწარმოებს მოლაპარაკებებს, ,,ჩვენ არ ვიცით ამ მოლაპარაკებების შინაარსი, მაგრამ ცხადია რომ ეს წევრობისთვის მოსამზადებელი მოლაპარაკებებია.“

ეს, ჩიკირბას აზრით „იქნება პირდაპირი საფრთხე აფხაზეთისთვის და რუსეთისთვის, ამაში რუსეთის და აფხაზეთის ინტერესები ემთხვევა“ „ამით აიხსნება ამ ხელშეკრულების გაფორმების აუცილებლობაც-აცხადებს ის - საქართველო, რომ მშვიდობისმოყვარე ქვეყანა ყოფილიყო, რუსეთთან ამ ფართომასშტაბიანი მოლაპარაკებების აუცილებლობა არ იქნებოდა“

დე ფაქტო მინისტრის განცხადებით „აუცილებელია ახალი შეთანხმების დეტალური განხილვა, რაც უკვე მიმდინარეობს პარლამენტში და საგარეო უწყებაში“ „ჩვენ გვჭირდება ექსპერტული პასუხები ამ პროექტზე“- აღნიშნა ჩიკირბამ.

„ახალი ხელშეკრულება ბევრ რამეში ემთხვევა 2008 წლის ხელშეკრულებას, აქ არის იგივე დებულებები, ახალი შეთანხმების საჭიროება კი გაუარესებულმა სიტუაციამ მოიტანა, - განაცხადა მან. რთული ვითარებაა უკრაინაში, ახლო აღმოსავლეთში, სირიაში, ერაყში და ყოველივე ეს ჩვენს გარშემო ხდება და ჩვენ გვჭირდება ამ გამოწვევებს ვუპასუხოთ. ბუნებრივია, ყველა ზომების მიღება ჩვენ მოკავშირეებთან ერთად მოხდება“.

ჩიკირბა მიიჩნევს, რომ ახალი შეთანხმების პროექტის განხილვა ექსპერტების მიერ მშვიდ სიტუაციაში უნდა მოხდეს, ცივი გონებით და არა ემოციების ფონზე, რადგან ამ შეთანხმებით აფხაზეთის მომავალი ბედი წყდება.