2014 წლის 29-30 ოქტომბერს, საქართველოს ეკონომიკისა და მდგრადი განვითარების სამინისტროსა და აზიის განვითარების ბანკის ინიციატივით, თბილისში, სასტუმრო „რედისონში“ მასშტაბური საერთაშორისო საინვესტიციო ფორუმი იმართება. დღეს ფორუმზე სიტყვით საქართველოს პრემიერმინისტრი, ირაკლი ღარიბაშვილი წარსდგა. ღარიბაშვილმა იმ მიღწევებზე ისაუბრა, რასაც საქართველომ ეკონომიკის სფეროში მიაღწია:

"უცხოური ინვესტიციების მოზიდვისათვის ჩვენ ინიციატივები წამოვიწყეთ, რომელთა მიზანიც რისკების შემცირება და ამონაგების გაზრდაა. ფართომასშტაბიან დონეზე საქართველოში უცხოური ინვესტიციების დასაფინანსებლად დაარსდა ახალი საჯარო და კერძო საინვესტიციო ფონდები, რომელთა განკარგულებაშიც მილიარდებია.

მათ შორის არის საქართველოს პარტნიორობის ფონდი, რომელიც ახორციელებს ინვესტიციებს ფართომასშტაბიან საინვესტიციო ინიციატივებში, ისე სოფლის მეურნეობის მენეჯმენტის ფონდები, რომლებიც წარმატებით აფინანსებენ სოფლის მეურნეობის პროდუქტების წარმოებას.

გარდა ამისა, ახალდაარსებული კერძო საინვესტიციო ფონდის - საქართველოს თანაინვესტირების ფონდის მიზანია საქართველოში ინვესტიციების განხორციელება და საქართველოს ეკონომიკაში საქმიანობის წარმართვის მსურველი ინვესტორებისათვის შესაძლებლობების შექმნა.

მართალია, საქართველოს წარმატებული წინსვლა არის ბევრი ადამიანის მიერ მრავალი წლის განმავლობაში გაწეული უდიდესი შრომის შედეგი, სწორედ ჩვენი მთავრობის მიერ უკანასკნელი ორი წლის განმავლობაში გატარებულმა ძირეულმა რეფორმებმა უზრუნველყო ამ მნიშვნელოვანი მომენტის დადგომა.

როგორც მოგეხსენებათ, ისეთ ქვეყანას, როგორიც საქართველოა, შეიძლება ჰქონდეს ყველაზე დაბალი გადასახადები მსოფლიოში და ბიზნესისათვის სხვა წამახალისებელი ფაქტორები, მაგრამ ინვესტორები, - ყოველ შემთხვევაში, სასურველი ინვესტორები, - არ შევლენ ქვეყანაში, თუ იქ არ სუფევს კანონის უზენაესობა.

ჩვენ დავაბრუნეთ კანონის უზენაესობა საქართველოში და მე ამით ვამაყობ. ჩვენ უკომპრომისო ბრძოლა გამოვუცხადეთ კორუფციას და წერტილი დავუსვით თანამდებობის პირთა დაუსჯელობას. საქართველო არა მხოლოდ ღია, არამედ უსაფრთხოც არის ბიზნესისათვის", - განაცხადა ირაკლი ღარიბაშვილმა.