თავდაცვის სამინისტროს დაკავებულ მაღალჩინოსნებს ბრალს დღეს წარუდგენენ. როგორც ცნობილია, არც ერთი მათგანი თავს დამნაშავედ არ ცნობს. დაცვის მხარე მათ უკანონო დაკავებაზე საუბრობს და აცხადებს, რომ გამოძიებას ამის საფუძველი არ ჰქონდა.

„დაკავებულ ნუკრი კაიშაურს წარმოდგენა არ აქვს, თუ რატომ არის დაკავებული. ის თემა, რაზეც, სავარაუდოდ შეიძლება მას მოედავნონ, არის აბსურდი. კაიშაური უსაფუძვლოდ არის დაკავებული. ამის უკან შეიძლება რაღაც ძალები იდგნენ. კონკრეტულად ბრალის წარდგენის შემდეგ ვისაუბრებთ“, - განაცხადა ნუკრი კაიშაურის ადვოკატმა დავით კორკოტაშვილმა.

საქართველოს მთავარი პროკურატურის მიერ ჩატარებული გამოძიების შედეგად, გამოვლენილ იქნა საქართველოს თავდაცვის სამინისტროს მოქმედი მაღალი თანამდებობის პირების მიერ სახელმწიფო ბიუჯეტის კუთვნილი 4 102 872 ლარის გაფლანგვის ფაქტი.