პრეზიდენტი ფარული მიყურადების საკითხთან დაკავშირებით შალვა შავგულიძეს და ვახტანგ ხმალაძეს შეხვდა

პოლიტიკა - 19:51, 28 Oct, 2014

1346

საქართველოს პრეზიდენტი გიორგი მარგველაშვილი საკანონმდებლო ორგანოს წარმომადგენლებს შალვა შავგულიძეს და ვახტანგ ხმალაძეს შეხვდა.
საუბრისას მათ პერსონალურ მონაცემთა დაცვის საკითხთან დაკავშირებით კანონპროექტი განიხილეს. ქვეყნის პირველმა პირმა დეპუტატების მოსაზრება მოისმინა ფარული მიყურადების საკანონმდებლო რეგულაციის შესახებ.
შეხვედრას ასევე ესწრებოდნენ პრეზიდენტის ადმინისტრაციის უფროსი დავით პატარაია და პრეზიდენტის საპარლამენტო მდივანი გიორგი კვერენჩხილაძე.
"საქართველოს პრეზიდენტს ბოლო თვეების განმავლობაში არაერთი შეხვედრა ჰქონდა თავად საკითხის ინიციატორებთან, არასამთავრობო ორგანიზაციების წარმომადგენლებთან, პარლამენტის წევრთა გარკვეულ ჯგუფთან. 3 ოქტომბერს შინაგან საქმეთა სამინისტროსაც მივმართეთ თხოვნით, რომ საკუთარი მოსაზრება გაეცნო პრეზიდენტისთვის, თუმცა, სამწუხაროდ, ეს შეხვედრა დღემდე არ შემდგარა. დღეს გაიმართა შეხვედრა იურიდიული კომიტეტის წარმომადგენლებთან. შეხვედრის მიზანი იყო ფარულ მიყურადებასთან დაკავშირებული საკანონმდებლო რეგულაციების ირგვლივ თავად ინიციატორთა პოზიციების გაცნობა", - აღნიშნა პრეზიდენტის საპარლმენტო მდივანმა გიორგი კვერენჩხილაძემ.
კვერენჩხილაძის თქმით, თუ აუცილებლობა მოითხოვს, ფარულ მოსმენებთან დაკავშირებულ კანონპროექტზე განხილული იქნება ვეტოს დადების საკითხი.
''მისი თქმით, ჯერ არ მიღებულ კანონზე ვეტოს დადებაზე საუბარი უხერხულად მიაჩნია. "დაველოდოთ მოვლენებს, როგორი სახით იქნება მიღებული, რა საკანონმდებლო რეგულაცია ჩამოყალიბდება. თუ მოითხოვს აუცილებლობა, თუ მოითხოვს საკითხი, რა თქმა უნდა, ეს თემაც განხილული იქნება", - აღნიშნა კვერენჩხილაძემ.