,,მოსკოვის მიერ ცხინვალთან ხელშეკრულების გაფორმება ბევრად უფრო საშიშია“

,,მოსკოვის მიერ ცხინვალთან ხელშეკრულების გაფორმება ბევრად უფრო საშიშია“ - თორნიკე შარაშენიძე

პოლიტიკა - 19:39, 28 Oct, 2014

1434

მოსკოვი ცხინვალთან თანამშრომლობის და ინტეგრაციის დოკუმენტის გაფორმებით აღნიშნულ რეგიონში მოქმედების თავისუფლებას „გაიპრავებს“, - ამის შესახებ ექსპერტმა თორნიკე შარაშენიძემ ,,ნიუპოსტთან" სააგენტო ,,ოსრადიოს" მიერ გავრცელებული ინფორმაციის კომენტირებისას განაცხადა.

როგორც „ნიუპოსტთან“ საუბრისას შარაშენიძემ აღნიშნა, ეს დოკუმენტი ქართული მხარისთვის უფრო საშიშია, ვიდრე აფხაზეთსა და მოსკოვს შორის გასაფორმებელი დოკუმენტი. ექსპერტის განმარტებით, ცხინვალიდან რუსეთს პირდაპირ შეუძლია იერიშის მიტანა და მთავარი გზატკეცილის გადაკეტვა.

„აღნიშნული შეთანხმების გაფორმება ცხინვალთან, უფრო დიდი საფრთხის შემცველია, რადგან ცხინვალის რეჟიმი ასი პროცენტით არის დამოკიდებული მოსკოვზე და რუსეთი მოქმედებების თავისუფლებას ცხინვალის რეგიონში უფრო მეტად „გაიპრავებს“. ცხინვალი თავისი გეოგრაფიული მდებარეობიდან გამომდინარე უფრო მეტად საშიშია, ვიდრე აფხაზეთი. ცხინვალის რეგიონიდან შეიძლება პირდაპირ თბილისზე შეტევის მიტანა და გადაჭრა მთავარი გზატკეცილის. ასევე, ამ ფონზე კახეთის გზატკეცილის მშენებლობის გეგმა, რომელიც თბილისს სრულიად ალყაში აქცევს“, - აცხადებს შარაშენიძე.

მისივე თქმით, ხელისუფლებამ ამ შემთხვევაში უნდა დაიწყოს პროაქტიური საგარეო პოლიტიკა და გააძლიეროს შეიარაღებული ძალები.

,,ხელისუფლებამ რაიმე ქმედება უნდა განახორციელოს კახეთის გზატკეცილის მშენებლობასთან დაკავშირებით. არ არის აუცილებელი ჩვენი მხრიდან ჩარევა. რუსეთმა უნდა იცოდეს, რომ გვყავს ძლიერი შეიარაღებული ძალები. არ უნდა შევუწყოთ რუსეთს ხელი ახალი გზების მშენებლობაში, რომელიც შეიძლება გამოყენებული იქნას სამხედრო მიზნებისთვის“, - განაცხადა შარაშენიძემ.

სააგენტო ,,ოსრადიოს" მიერ გავრცელებული ინფორმაციის თანახმად, ცხინვალის ე.წ. პარლამენტის სპიკერმა ანატოლი ბიბილოვმა განაცხადა, რომ თანამშრომლობის და ინტეგრაციის დოკუმენტი მოსკოვსა და ცხინვალს შორისაც მზადდება.