„ნაციონალური მოძრაობის“ წევრი დავით დარჩიაშვილი მოსკოვსა და ცხინვალს შორის თანამშრომლობის და ინტეგრაციის დოკუმენტს შესაძლო გაფორმებას ეხმაურება.

„ნიუპოსტთან“ საუბარში დარჩიაშვილი ამბობს, რომ აღნიშნული დოკუმენტი რუსეთის მხრიდან ანექსიის ფორმალიზებას ნიშნავს.

„აღნიშნული დოკუმენტი შეიძლება ითქვას, რომ არის რუსეთის მხრიდან ანექსიის ფორმალიზება. ანექსირებულია ეს ტერიტორიები, იქ კონტროლს ახორიცელებს ოკუპანტი, ამას ჰქვია ფაქტობრივი ანექსია. ამ დოკუმნეტით ხდება ამ ყველაფრის ფორმალიზება და რუსეთის ფედერაციასთან ოკუპირებული ტერიტორიების ინტეგრაციისკენ ნაბიჯების გადადგმა. ჩვენი მთავრობის წარმომადგენლები სხვა ფილოსოფიით მოვიდნენ, რომ რუსეთი ჩვენ გაგვიკეთებდა რამეს, ვიმეგობრებდით რუსებთან და თან ევროპელები დავრჩებოდით. ეს იყო მათი დეკლარაცია და რა გამოდის აქედან ხედავთ“, - აცხადებს დარჩიაშვილი.

სააგენტო ოსრადიოს მიერ გავრცელებული ინფორმაციის თანახმად, ცხინვალის ე.წ. პარლამენტის სპიკერმა ანატოლი ბიბილოვმა განაცხადა, რომ თანამშრომლობის და ინტეგრაციის დოკუმენტი მოსკოვსა და ცხინვალს შორისაც მზადდება.

„ხელშეკრულება, რომელიც მზადდება, უფრო ფართო იქნება, ვიდრე აფხაზური ვერსია. ხელშეკრულების ის ვარიანტი, რომელიც აფხაზეთსა და რუსეთს შორის ხელმოსაწერად მზადდება, სამხრეთ ოსეთის ხალხის ყველა მისწრაფებას, რუსეთის ფედერაციაში შესვლის სურვილს არ ასახავს“, - განაცხადა ბიბილოვმა და აღნიშნა, რომ დოკუმენტი ამჟამად შემუშავების სტადიაშია და მას ხელი წლის ბოლომდე უნდა მოეწეროს.