დღეს ჩანიშნულ უშიშროების საბჭოს სხდომასთან დაკავშირებით ირინა იმერლიშვილი კიდევ ერთ განმარტებას აკეთებს. იმერლიშვილის განმარტებით, პრემიერმინისტრი სხდომაზე დღეს მოხსენებით არ წარსდგება:

„გარდა მუდმივი წევრებისა, დაესწრებიან მოწვეული წევრებიც. დღის წესრიგი არის აფხაზეთში შექმნილი მდგომარეობა. ამ საკითხთან დაკავშირებით მომხსენებელი იქნება საგარეო საქმეთა მინისტრი, ქალბატონი მაია ფანჯიკიძე და ბატონი პაატა ზაქარეიშვილი, სახელმწიფო მინისტრი. პრემიერი უშიშროების საბჭოს მუდმივმოქმედი წევრი გახლავთ, შესაბამისად იგი დაესწრება სხდომას, თუმცა, პრემიერი მოხსენებით არ წარსდგება. მე იმედი მაქვს, რომ მას შემდეგ, რაც კონსტიტუციასთან მოვა შესაბამისობაში უშიშროების შესახებ ორგანულ კანონში ცვილებები, პრემიერი და ყველა მუდმივმოქმედი წევრი დაესწრებიან იმ სხდომებს, რომელზეც იქნება კომპეტენტური, იმსჯელოს უშიშროების საბჭომ“, - განაცხადა ირინა იმერლიშვილმა.

უშიშროების საბჭოს სხდომა დღეს 18:00 საათზე გაიმართება. სხდომას საქართველოს პრემიერმინისტრი და რამდენიმე სახელმწიფო მინისტრიც დაესწრება. შეხვედრა პრეზიდენტის რეზიდენციის ადმინისტრაციულ ნაწილში შედგება. როგორც ცნობილია, სხდომას არ დაესწრებიან ნოდარ ხადური, ირაკლი ალასანია და ალექსი პეტრიაშვილი, რადგან ისინი სამუშაო ვიზიტით საზღვარგარეთ იმყოფებიან.