იუსტიციის სამინისტროს საჯარო რეესტრის ეროვნული სააგენტოს თავმჯდომარე პაპუნა უგრეხელიძე და სააგენტოს ხელმძღვანელობა შვედეთის კარტოგრაფიის, კადასტრისა და მიწის რეგისტრაციის ადმინისტრაციული ორგანოსთან “Lantmateriet”-ის ექსპერტებს შეხვდა. შეხვედრაზე მხარეებმა მომავალი თანამშრომლობის ძირითადი მიმართულებები განსაზღვრეს და ახალი საპროექტო წინადადება განიხილეს.

შვედი სპეციალისტები სააგენტოს მენეჯმენტს მონაცემთა ხარისხის გაუმჯობესების, ქონების რეგისტრაციის, ინფორმაციული ტექნოლოგიების განვითარების, საკადასტრო სტანდარტების დანერგვის, გეოდეზიისა და კარტოგრაფიის სისტემის, ეროვნული სივრცითი ინფორმაციის ინფრასტრუქტურის ჩამოყალიბებასა და განვითარების საკითხებთან დაკავშირებით კონსულტაციებს გაუწევენ.

როგორც სააგენტოს თავმჯდომარემ, პაპუნა უგრეხელიძემ აღნიშნა: „სააგენტოსა და ლანდმატერატს 10 წლიანი თანამშრომლობა აკავშირებთ. ამ ხნის განმავლობაში შვედურმა მხარემ მნიშვნელოვან წვლილი შეიტანა ქართული სარეგისტრაციო სისტემის ჩამოყალიბების პროცესში. ახლა უკვე სააგენტო განვითარების ახალ ეტაპზეა გადასული. მიმდინარეობს საჯარო რეესტრის ძირითად მიმართულებების ცენტრალიზაცია, ასევე, სარეგისტრაციო სამსახურების გამსხვილება რეგიონულ დონეზე, რაც ხელს შეუწყობს ერთიანი სარეგისტრაციო პოლიტიკის შემუშავებას და დანერგვას ქვეყნის მასშტაბით. შვედეთს ამ მიმართულებით აქვს კარგი გამოცდილება და ამ გამოცდილების გაზიარება ჩვენი კოლეგებისგან მნიშვნელოვნად დაგვეხმარება პროცესის სწორად დაგეგმვაში. ვიზიტის ფარგლებში ახალი თანამშრომლობის ფორმატი შემუშავდება, რომელიც იმ ძირითად პრინციპებზე იქნება აგებული, რა გამოწვევებიც აქვს დღეს ჩვენს ქვეყანაში საჯარო რეესტრის ეროვნულ სააგენტოს“.

პროექტის განხორციელება შვედეთის საერთაშორისო განვითარების სააგენტოს (SIDA) მხარდაჭერით იგეგმება.