დაკავშირებულია თუ არა პრემიერ-მინისტრის მისვლა უშიშროების სხდომაზე აფხაზეთის და სამხრეთ ოსეთისთვის ფართო ავტონომიის შეთავაზების საკითხთან, ამის შესახებ „ნიუპოსტი“ ექსპერტ თორნიკე შარაშენიძეს ესაუბრა.

შარაშენიძის განცხადებით პრემიერის უშიშროების სხდომაზე მისვლა შიდა პოლიტიკისთვისაა განკუთვნილი და ამ ნაბიჯით პრემიერი ცდილობს კონსტრუქციული გამოჩნდეს.

„ღარიბაშვილის უშიშროების საბჭოზე მისვლა უფრო შიდა პოლიტიკისთვისაა განკუთვნილი , მას სურს კონსტრუქციულ პოლიტიკოსად გამოჩნდეს, რადგან აქამდე მარგველაშვილი ჩანდა უფრო კონსტრუქციულად. საინტერესოა უშიშროების სხდომაზე ღარიბაშვილი როგორ მივა როგორც პირველი თუ როგორც მეორე პირი“- აღნიშნა შარაშენიძემ.

შეგახსენებთ უშიშროების საბჭოს სხდომა ხვალ პრეზიდენტის რეზიდენციაში 18:00 საათზე გაიმართება. ამის შესახებ ინფორმაცია უშიშროების საბჭოს მდივანმა გაავრცელა. როგორც ცნობილი გახდა, წინა სხდომისგან განსხვავებით პრეზიდენტის მიერ მოწვეულ უშიშროების საბჭოს სხდომას საქართველოს პრემიერმინისტრი ირაკლი ღარიბაშვილიც დაესწრება.