ექსპერტ თორნიკე შარაშენიძის განცხადებით, აფხაზეთის და სამხრეთ ოსეთისთვის ავტონომიის შეთავაზებას მაშინ აქვს აზრი თუ უკვე ჩატარებულია წინასწარი მოლაპარაკებები.

„ავტონომიის შეთავაზებაში ახალი არაფერია, ეს კეთდებოდა დიდი ხნის განმავლობაში, ფართო ავტონომიას სთავაზობდნენ. ერთადერთი ამ შეთავაზებას მაშინ აქვს აზრი, თუ უკვე რაიმე ფარული მოლაპარაკება ჩატარდა აფხაზებთან, რაც ჩვენ არ ვიცით“- აღნიშნავს შარაშენიძე.

შარაშენიძე აცხადებს, რომ ამ საკითხში გასათვალისწინებელია რუსეთის ფაქტორიც, რადგან აფხაზეთის საკითხს ერთპიროვნულად რუსეთი წყვეტს , ისე რომ აფხაზებს არაფერს ეკითხება:

„ აქ საკითხავია ისიც, რამდენად დათანხმდებიან ამაზე რუსეთში, ამ შეთავაზებას პოზიტივი მაშინ ექნება, თუ ამ მხრივ რაღაც სამუშაო უკვე ჩატარდა. სხვა შემთხვევაში ამაში ახალი არაფერი არ არის და აფხაზები ამას უპასუხებენ დამცინავი ტონით, რუსეთმა აფხაზეთს დაუწერა შეთანხმების პროექტი, რაც იმას ნიშნავს რომ ის ერთპიროვნულად წყვეტს ყველაფერს აფხაზეთში, ისე რომ მათ არაფერს ეკითხებიან, რომ აღარაფერი ვთქვათ სამხრეთ ოსეთზე, ასე რომ ჩვენი მოლაპარაკება აფხაზეთთან შეიძლება აზრს მოკლებული იყოს თუ მოლაპარაკებები არ ჩატარდა რუსეთთან. ეს არის ძალიან მწარე რეალობა და რუსეთი რას მოითხოვს ამის სანაცვლოდ ამაზე ფიქრიც არ მინდა.“-ამბობს თორნიკე შარაშენიძე.

შეგახსენებთ, საქართველოს პრემიერ-მინისტრმა ირაკლი ღარიბაშვილმა ოკუპირებულ ტერიტორიებზე მცხოვრებ მოსახლეობას ფართო ავტონომიის პირობებში, ერთიანი და ძლიერი საქართველოს ფარგლებში თანაცხოვრება შესთავაზა, ამის შესახებ განცხადება მან მმართველობის ორი წლის ანგარიშის წარდგენის დროს გააკეთა