სოფლის მეურნეობის ყოფილი მინისტრი დავით კირვალძე საერთაშორისო არასამთავრობო ორგანიზაციას ქმნის.

„ამ ცენტრის შექმნის იდეა ყაზბეგში გაჩნდა...ამ კუთხეს, თავისი გეოგრაფიული მდებარეობით, განსაკუთრებული მნიშვნელობა აქვს და ჩემი აზრით, ურიგო არ იქნება, თუკი კავკასიის ცენტრის ოფისი, სწორედ საქართველოში, უფრო კონკრეტულად კი ყაზბეგში განთავსდება.

მთას განსაკუთრებული დატვირთვა აქვს. მხოლოდ იმის ხსენებაც საკმარისია, რომ დედამიწაზე სასმელი წყლის რესურსების 60%-ზე მეტს მთებიდან ვიღებთ, მთიანეთის ტყეები კი დედამიწის მთლიანი ტყის საფარის 23%-ს შეადგენს. მთიანეთის წიაღში მრავალი ბუნებრივი, ბიოლოგიური და მინერალური რესურსია, რაც ადგილობრივი მოსახლეობისთვის მნიშვნელოვანი საარსებო წყაროა. აქედან გამომდინარე, მთის მეცნიერულ დონეზე შესწავლა, ეკონომიკური თანამშრომლობის გაღრმავება და გარემოსდაცვითი ღონისძიებების გატარება აუცილებელია.

კავკასიის მთიანეთი მრავალი სერიოზული გამოწვევის წინაშე დგას, მათ შორისაა ჩაკეტილი საზღვრების, მყინვარების დნობისა და მეწყრული ზონების პრობლემები, რომელთა გათვალისწინებითაც, აუცილებელია, კავკასიის რეგიონში მთიანეთის კვლევისა და განვითარების ცენტრი დაფუძნდეს ჩვენი ცენტრის მკვლევარებსა და მეცნიერებს კვლევებისას წინასწარ განსაზღვრული დამოკიდებულება არ უნდა ჰქონდეთ. სწორედ ესაა ცენტრის მომხიბვლელობა. კვლევებს ის მეცნიერები ჩაატარებენ, რომლებიც კონკურსით, ზუსტად ისე შეირჩევიან, როგორც ეს საერთაშორისო ორგანიზაციებშია მიღებული. „კავკასიის ცენტრი“ გადაწყვეტილებას კი არ მიიღებს, რეკომენდაციებს შეიმუშავებს და საკუთარ მოსაზრებას ჩამოაყალიბებს.

საერთოდ, ბუნებაში ადამიანის ჩარევის თემას ვერ ავცდებით, რადგან სხვაგვარად, პროგრესი წარმოუდგენელია, თუმცა ჩარევასაც თავის ლიმიტი აქვს. გარკვეულ ჩარჩოებში მოქცეული ჩარევა გარემოში შეუქცევად ცვლილებებს არ იწვევს. ეკოლოგიის, როგორც მეცნიერების არსია, დაადგინოს, ბუნებაში ადამიანის ჩარევა რა მასშტაბით შეიძლება. ამ შემთხვევაში, მხოლოდ ჰიდროელექტროსადგურებს კი არა, სხვა მრავალ საკითხსაც ვგულისხმობ, მაგალითად, მთიანეთში საძოვრების პრობლემას რამდენმა ცხვარმა შეიძლება იბალახოს 1 ჰექტარზე და რამდენი დღის განმავლობაში? თუ დადგენილი ზღვარი დაირღვევა, ამას ფერდობების გადაძოვება მოჰყვება, გადაძოვება კი ეროზიას იწვევს, რაც ნიადაგს გადარეცხავს. შესაბამისად, საძოვარს დიდი ხნით დავკარგავთ, რადგან ნიადაგის წარმოქმნას ასეულობით წელი სჭირდება. ეს ისეთი ბუნებრივი რესურსია, რომელსაც ცოდნა, მოვლა და მოფრთხილება სჭირდება და „კავკასიის ცენტრმა“ სწორედ ამ თემებზე უნდა იმუშაოს, რადგან მთაში ეს პრობლემა განსაკუთრებით სენსიტიურია! ცენტრი მთიან რეგიონებში მცხოვრები ადამიანების ეკონომიკური თუ საცხოვრებელი პირობების გაუმჯობესებაზე ორიენტირებულ პროექტებსაც შეიმუშავებს და განახორციელებს“, - განაცხადა კირვალიძემ.

წყარო: გაზეთი „ვერსია“