რუსული აგრესიის წინააღმდეგ პროდასავლური ძალების კონსოლიდირება უნდა მოხდეს

რუსული აგრესიის წინააღმდეგ პროდასავლური ძალების კონსოლიდირება უნდა მოხდეს - ბაჩუკი ქარდავა

პოლიტიკა - 16:20, 25 Oct, 2014

2081

,,ნაციონალური მოძრაობის“ მიერ საგარეო პოლიტიკურ საფრთხეებთან დაკავშირებით დაანონსებულ 15 ნოემბრის აქციაზე კომენტარი გააკეთა ეროვნულ-დემოკრატიული პარტიის ლიდერმა ბაჩუკი ქარდავამ. ოპოზიციის ერთ-ერთი ლიდერი მიიჩნევს, რომ რუსეთის მხრიდან ანექსიის მცდელობას ქართულმა საზოგადოებამ შესაბამისი პასუხი უნდა გასცეს და ამ საკითხის გარშემო, წყალგამყოფის გაჩენა არასწორია. მისი თქმით, უკვე დაწყებულია მუშაობა ,,აფხაზთა კრების“ მოწვევასთან დაკავშირებით, რომელიც ზუგდიდში გაიმართება. ქარდავა აცხადებს, რომ საქართველოს ტერიტორიების ანექსიასასა და რუსულ აგრესიაზე საზოგადოება უნდა იყოს ერთიანი, მათ შორის უნდა მოხდეს კონსოლიდირება იმ პოლიტიკური ძალების, რომელთა ორიენტირი მიმართულია დასავლეთისკენ და რომლებიც რუსული პოლიტიკის ინტერესებს არ ემსახურებიან.

„ჩვენ უკვე დავიწყეთ მუშაობა აფხაზთა კრების მოწვევის მიზნით ზუგდიდში, ეს კრება 8 ნოემბერს ჩატარდება. თუმცა, მიმაჩნია, რომ ნებისმიერი პოლიტიკური აქტივობა, რომელი პოლიტიკური ჯგუფიდანაც არ უნდა მომდინარეობდეს ეს და თუნდაც, იყოს საპარლამენტო ოპოზიციის მხრიდან, აუცილებელი და საჭიროა შედგეს კონსულტაციები და მაქსიმალურად მოვახერხოთ რუსული აგრესიის წინააღმდეგ საზოგადოებრივი ერთობის დაფიქსირება. შიდა პოლიტიკური საკითხების გამო, რაღაც წყალგამყოფების გაჩენა, მიმაჩნია, რომ არასწორი იქნება მაშინ, როცა აფხაზეთის ანექსიის საკითხი დგას დღის წესრიგში და რუსეთი ცდილობს, მორიგი აგრესიული პოლიტიკის წამოწყებას საქართველოს წინააღმდეგ“, - განაცხადა ბაჩუკი ქარდავამ.