დღეიდან თბილისის მერიის განათლების, სპორტის და ახალგაზრდობის საქმეთა საქალაქო სამსახურს ვიცე-პრემიერის, კახი კალაძის ცოლის ძმა უხელძღვანელებს. ამ პოსტზე გიორგი არეშიძის კანდიდატურა საკრებულომ დღევანდელ სხდომაზე უკვე დაამტკიცა. ხმაური საკრებულოში სამი კომისიის გაერთიანებულ სხდომაზე სწორედ მერიის განათლების, სპორტისა და ახალგაზრდობის საქმეთა საქალაქო სამსახურის უფროსის თანამდებობაზე გიორგი არეშიძის წარდგენამ გამოიწვია. "ნაციონალური მოძრაობის" წევრმა ირაკლი ნადირაძემ განაცხადა, რომ გიორგი არეშიძის ამ თანამდებობაზე დანიშვნა "ქართული ოცნების" ხელისუფლებაში ნეპოტიზმის გაგრძელებას ემსახურება. მისი განცხადებით, გიორგი არეშიძეს CV-ში სამუშაო გამოცდილებად მხოლოდ "ქართულ ოცნებაში" ყოფნა უწერია. ნადირაძის განცხადებით, გიორგი არეშიძე თანამდებობაზე მხოლოდ იმიტომ ინიშნება, რომ ის ენერგეტიკის მინისტრის, კახა კალაძის ცოლისძმაა.

ნადირაძის ამ განცხადებას სხდომაზე საკრებულოს წევრების მხრიდან ხმაური მოყვა. მათ ირაკლი ნადირაძეს "ნაციონალური მოძრაობის" ხელისუფლებაში ყოფნის პერიოდი შეახსენეს და აღნიშნეს, რომ გასული 9 წლის განმავლობაში თანამდებობაზე დანიშვნა ხდებოდა ნეპოტიზმით.

თავად გიორგი არეშიძემ კი განაცხადა, რომ პოლიტიკაში სწორედ მაშინ გამოჩნდა, როდესაც ბიძინა ივანიშვილმა აქტიური საქმიანობა დაიწყო.

"მე და ჩემი სიძის, კახა კალაძის პოლიტიკაში მოღვაწეობა ერთად დაიწყო. ძალიან მეამაყება, რომ კახა კალაძე ჩემი სიძეა, მაგრამ მე არ ვაპირებ ვინმეს ჩრდილქვეშ ვიყო. მე ვარ გიორგი არეშიძე და CV-ში სწორედ ასე მიწერია და სწორედ ჩემი სახელი და გვარით ვაპირებ პოლიტიკური კარიერის გაგრძელებას. არსად მითითებული არ მაქვს, რომ მე ვარ კახა კალაძის ცოლისძმა", - განაცხადა გიორგი არეშიძემ.