ამერიკის შეერთებული შტატების სახელმწიფო დეპარტამენტის განცხადებას, საქართველოში მიმდინარე სასამრთლო პროცესებთან დაკავშირებით, ექსპერტი ლევან ალაფიშვილი კრიტიკულს უწოდებს. როგორც „ნიუპოსტთან“ საუბრისას ალაფიშვილმა აღნიშნა, აშშ და დასავლური სამყარო საქართველოს მეგობრები არიან, ამიტომ „კრიტიკული შეფასება და რიგ შემთხვევაში გადამეტებული კრიტიკაც კი უნდა ეპატიოს მეგობარს“. ეს ყოველივე კი იმისათვის კეთდება, რომ საქართველო უკეთესი იყოს:

„ისევე, როგოც ყველა სხვა განცხადება, რომელიც ამერიკის სახელმწიფო დეპარტამენტმა გააკეთა, ეს განცხადებაც ერთ ჭრილშია განსახილველი. ეს ჩვენი დიდი მეგობრების, მხარდამჭერების კეთილი სურვილები და რეკომენდაციებია. მაქსიმალურად შესაძლებელია, შიდა სპეციფიკა არ იცოდენენ, მაგრამ გარედან დანახული ობიექტურად შეფასებული მდგომარეობაა ქვეყნის შიგნით. ისინი მიუდგნენ იმ კუთხით, თუ რა გვაკლია იმ გზაზე, რომელსაც ჰქვია დემოკრატიულ ოჯახში დამკვიდრება, დემოკრატიული სტანდარტებით ცხოვრების წესისთვის. ასე რომ შევხედოთ, ყველაზე სწორი ეს იქნება. სხვა შემთხვევაში საზოგადოებაში შესაძლოა არასწორი განწყობის ფორმირებასთან გვქონდეს საქმე. რა თქმა უნდა ეს განცხადება არის კრიტიკული, მეგობარი იმისთვის გინდა, რომ პირველ რიგში კრიტიკული იყოს, იმისათვის, რომ ჩვენ ვიყოთ კარგები.

მეგობარს გადაჭარბებაც შეიძლება ეპატიებოდეს. თუმცა, ეს კრიტიკული განცხადებები ჩვენთვის სასიკეთოდაა გაკეთებული. თუკი ამერიკას ან დასავლურ სამყაროს შევადარებთ რუსეთს - რუსეთი სულ არ არის კრიტიკული ჩვენს მიმართ. პოლიტიკოსებიც თუ ასე შეხედავენ ამ ყველაფერს, ორაზროვნებაც არ იქნება ამ საკითხთან დაკავშირებით“, - განაცხადა „ნიუპოსტთან“ საუბრისას ლევან ალაფიშვილმა.

შეგახსენებთ, რომ საქართველოს თავდაცვისა და შინაგან საქმეთა ყოფილი მინისტრების წინააღმდეგ გამოტანილ სასამართლო განაჩენს შეერთებული შტატების სახელმწიფო დეპარტამენტი გამოეხმაურა.

პრესმდივნის ჯენ პსაკის განცხადებით, ვაშინგტონი განაგრძობს საქართველოს მთავრობის ყურადღების გამახვილებას პროცესუალური ნორმების დაცვასა და კანონიერების მნიშვნელობაზე, რათა პოლიტიკური შურისძიების მიზნით სასამართლო სისტემის გამოყენების აღქმა გამოირიცხოს.