საქართველოს თავდაცვისა და შინაგან საქმეთა ყოფილი მინისტრების წინააღმდეგ გამოტანილ სასამართლო განაჩენს შეერთებული შტატების სახელმწიფო დეპარტამენტი გამოეხმაურა.

პრესმდივნის ჯენ პსაკის განცხადებით, ვაშინგტონი განაგრძობს საქართველოს მთავრობის ყურადღების გამახვილებას პროცესუალური ნორმების დაცვასა და კანონიერების მნიშვნელობაზე, რათა პოლიტიკური შურისძიების მიზნით სასამართლო სისტემის გამოყენების აღქმა გამოირიცხოს.

სახელმწიფო დეპარტამენტის წარმომადგენელს კონკრეტულ შემთხვევებზე არ უსაუბრია, თუმცა აღნიშნა, რომ არსებობს მთელი რიგი განაჩენები, რომელზეც შეერთებული შტატები ამ დროის განმავლობაში საკუთარ პოზიციას აფიქსირებდა.

ჯენ ფსაკის თქით, შეერთებული შტატები განაგრძობს საქართველოს მხარდაჭერას დემოკრატიული განვითარების პროცესში, რომელიც პოლიტიკურ პლურალიზმს და ღია დებატებს უნდა გულისხმობდეს.

„ჩვენ თვალყურს ვადევნებთ გამოძიების პროცესს, განვაგრძობთ საქართველოს მთავრობის ყურადღების გამახვილებას პროცესუალური ნორმების დაცვასა და კანონიერების მნიშვნელობაზე. ასევე, გამოძების გამჭვირვალედ ჩატარებაზე, რათა პოლიტიკური შურისძიების მიზნით, სასამართლო სისტემის გამოყენების აღქმაც კი გამოირიცხოს. განვაგრძობთ საქართველოს დემოკრატიული განვითარების მხარდაჭერას, რომელშიც უნდა იყოს პოლიტიკური პრულარიზმის პატივისცემა და ღია დებატები. ჩვენ უკვე გამოვხატეთ შეშფოთება რამდენიმე საქმის მსვლელობასთან დაკავშირებით და ეს შეშფოთება ისევ ძალაში რჩება. არ მინდა კონკრეტულ შემთხვევებს ჩავუღრმავდე, როგორც იცით, თითოეული მათგანი განსხვავდება. თუმცა, ზოგადად იყო მთელი რიგი განაჩენები, რასთან დაკავშირებითაც, შეშფოთებას გამოვხატავდით. როცა მიუთითებ, რომ უერთგულონ სამართლის უზენაესობას და სასამართლოს, რათა სისტემამ იმუშაოს საერთაშორისო სტანდარტების შესაბამისად, ეს უკვე ნიშნავს იმას, რომ ჩვენი შეხედულება ზოგ შემთხვევაში არ იქნა გათვალისწინებული“, - განაცხადა პსაკიმ.