მაღლი რანგის ვიზიტების ჩაშლა ქვეყნისთვის შესაძლოა საზიანო იყოს, თუმცა უშიშროების საბჭოს ჩატარება პრეზიდენტმა როგორც ჩანს უფრო პრიორიტეტულად მიიჩნია - ასე ეხმაურება უმრავლესობის ნაწილი საქართველოს პრეზიდენტის ბრიუსელში ვიზიტის ჩაშლას.

"ვიზიტების ჩაშლა, შეხვედრების ორგანიზება, საერთოდ აწეული თემა, რომელიც საერთოდ არ უკავშირდება საქმეს. ვერსიები ბევრია, მაგრამ გაცილებით პრიმიტიულად არის სიტუაცია, ვიდრე ვერსიები ვრცელდება. ჩვენ გვექნება ამაზე უფრო ღრმა და ფართო მსჯელობის შესაძლებლობა“, - განაცხადა უმრავლესობის დეპუტატმა გიორგი ვოლსკიმ.

საპარლამენტო უმცირესობაშიც ასევე მიაჩნიათ, რომ ვიზიტების ჩაშლა ქვეყნის იმიჯს აზარალებს. „ერთიან ნაციონალურ მოძრაობაში“ აცხადებენ, რომ მათ კონკრეტული ინფორმაცია ვიზიტის შინაარსის შესახებ არ აქვთ, თუმცა თუ პრეზიდენტს სურვილი ჰქონდა ბრიუსელში შეხვედრები ჩაეტარებინა და საგარეო საქმეთა სამინისტრო მას ამაში არ დაეხმარა სამწუხარო ფაქტია.

მარგველაშვილი ბრიუსელში პირველი მსოფლიოს ომის დაწყების თარიღთან დაკავშირებით დაგეგმილ ღონისძიებას უნდა დასწრებოდა.

როგორც ბენელუქსის ქვეყნებში საქართველოს საელჩოს მიერ ბელგიის მხარისათვის გაგზავნილ ნოტაში წერია, პრეზიდენტი უშიშროების საბჭოს სხდომის დანიშნვის გამო ბრიუსელში ვერ გაემგზავრება.