რუსეთსა და ოკუპირებულ აფხაზეთს შორის „მოკავშირეობისა და ინტეგრაციის“ შესახებ ხელშეკრულების გაფორმება მიუღებელია და ევროპა ამას არასოდეს შეეგუება - ეს განცხადება ლიტვის პრეზიდენტმა, დალია გრიბაუსკაიტემ ქართველ ჟურნალისტებთან ინტერვიუში გააკეთა.

რეგიონში არსებულ კონფლიქტებზე ისაუბრა ფინეთის საგარეო საქმეთა მინისტრმაც და განაცხადა, რომ ამ კუთხით გაუმჯობესების ნაცვლად, ვითარება გაუარესდა, რადგან აქამდე არსებულ ოთხ კონფლიქტურ რეგიონს ახლა ყირიმიც დაემატა.

„ვითარება საკმაოდ დაძაბულია, ჩვენ ოთხი გაყინული კონფლიქტი გვაქვს, ყარაბაღში, დნესტრისპირეთში, აფხაზეთსა და სამხრეთ ოსეთში. ახლა ამას ყირიმი დაემატა. ვფიქრობთ აღმოსავლეთ უკრაინაში არსებული ვითარება საკმაოდ საშიშია, იქ ვითარება არ გაუმჯობესებულა, რუსეთის ჯარი რ გასულა და საზღვრებს უკრაინა ვერ აკონტროლებს. ამ მხრივ მნიშვნელოვანია 26 ოქტომბრის არჩევნები“, - განაცხადა შტუბმა.

ალექსანდრ შტუბი და დალია გრიბაუსკაიტე ბრუსელში ევროსაბჭოს სამიტს ესწრებიან. მთავარი განსახილველი საკითხები ევროზონის ეკონომიკა, ინვესტიციების მოზიდვა და სამუშაო ადგილები, ასევე ებოლას ვირუსი და უკრაინაში შექმნილი ვითარებაა.