რუსეთსა და ოკუპირებულ აფხაზეთს შორის სამეკავშირეო ხელშეკრულება იაპონიაში მარგველაშვილის მიერ გამართული ყველა შეხვედრის მთავარი თემაა. პრეზიდენტის მრჩეველმა საგარეო ურთიერთობათა საკითხებში თენგიზ ფხალაძემ განაცხადა, რომ ამ თემის აქცენტირებას ქართული მხარე რამდენიმე მიზეზით ცდილობს.

მისი თქმით, იაპონია არის დიდი 7-იანის წევრი ქვეყანა, ასევე გაეროს უშიშროების საბჭოს მუდმივმოქმედი წევრი და ქვეყანა, რომელმაც რამდენიმე დღის წინ ოფიციალურად განაცხადა იმის შესახებ, რომ რუსეთის პრეზიდენტის ვლადიმერ პუტინის დაგეგმილი ვიზიტი იაპონიაში ნოემბრის ბოლოს გაუქმებულია და ამის მთავარ მიზეზად უკრაინაში მიმდინარე მოვლენები დაასახელა.

ფხალაძე აცხადებს, რომ ის პრობლემები, რომლებიც დღევანდელ დღეს არსებობს საქართველოში და ზოგადად, რაც ხდება, რუსეთის სამეზობლოში და რასაც რუსეთი პრივილეგირებული ინტერესების სფეროს პოლიტიკას ეძახის, წარმოადგენს საფრთხეს თანამედროვე მსოფლიოსთვის. მისივე თქმით, სწორედ ამიტომ დემოკრატიულ სახელმწიფოებს ერთიანი პოზიციის გაჟღერება სჭირდებათ.