სასტუმრო „ვერე-პალასში’ 16 არასაპარლამენტო პარტიის წარმომადგენელმა ერთობლივი შეხვედრა გამართა. პოლიტიკურმა სუბიექტებმა ინტერპარტიული ჯგუფი რამდენიმე დღის წინ შექმნეს, რომელიც მიზნად საარჩევნო კოდექსში შესატანი ცვლილებების მოამზადებას ისახავს.

ინტერპარტიული ჯგუფი აქცენტს საარჩევნო კოდექსში არსებულ რამდენიმე საკითხზე აკეთებს. შემუშავებულია აუცილებელი ცვლილებების გარკვეული ჩამონათვალიც, მათ შორისაა საარჩევნო სისტემის ცვლილება, საარჩევნო სიების ბიომეტრიული ტექნოლოგიებით ფორმირება, პოლიტიკურ სუბიექტებს შორის თანაბარი საარჩევნო პირობების უზრუნველყოფა და ადმინისტრაციული რესურსით მანიპულაციის აღკვეთა.

აღნიშნულ თემასთან დაკავშირებით და დღევანდელი დღის დეტალების შესახებ „ნიუპოსტთან“ „ქართული დასის“ ლიდერმა ჯონდი ბაღათურიამ ისაუბრა.

„დღეს ჩვენ საბოლოოდ შევჯერდით პრიორიტეტებზე, რომელიც ასე დალაგდა, ნომერ პირველი საკითხი, რომლის დამუშავება ჩვენ უკვე დავიწყეთ, ეს არის საარჩევნო სისტემის ცვლილება, რომელიც გულისხმობს პარაზიტულად გადაქცეული მაჟორიტარული სისტემის გაუქმებას, როგორც ივანიშვილი უწოდებს მას წვრილ-წვრილ ფეოდალებად რომ გადაიქცნენ, აი ამ სისტემის გაუქმებას და მის ნაცვლად უფრო სამართლიანი სისტემის შემოღებას და როგორ უნდა იყოს ეს სამართლიანი სისტემა, ამაზე უკვე ვმსჯელობთ, თუმცა ის რომ ეს სისტემა უნდა გაუქმდეს, ამაზე უკვე ყველანი შეთანხმებულები ვართ. მეორე, ეს არის ადმინისტრაციის ფორმირების წესი და მესამე ეს არის საარჩევნო სიები, ეს თანმიმდევრობა არის ჯერჯერობით, თუმცა, კიდევ არის ძალიან მნიშვნელოვანი საკითხები, რომლებზეც ჩვენ მუშაობა მოგვიწევს, მაგრამ საკითხების თანმიმდევრობა იქნება ასეთი. რაც შეეხება თემებს, როგორც კი მოხდება შეთანხმება, საარჩევნო სისტემა როგორი უნდა იყოს და შეთანხმებას მივაღწევთ, კონსესუსით მონაწილე პარტიებს შორის, მეორე დღიდანვე დაიწყება საზოგადოებისათვის ამის შეტყობინება და ხელისუფლების წინაშე ამ თემის ლობირება“,- აღნიშნა ჯონდი ბაღათურიამ.