ოპოზიციურმა პარტიებმა საარჩევნო კოდექსთან დაკავშირებით მორიგი შეხვედრა გამართეს

პოლიტიკა - 15:56, 23 Oct, 2014

1320

სასტუმრო „ვერე-პალასში"16 არასაპარლამენტო პარტიის წარმომადგენელმა ერთობლივი შეხვედრა გამართა. პოლიტიკურმა სუბიექტებმა ინტერპარტიული ჯგუფი რამდენიმე დღის წინ შექმნეს, რომელიც მიზნად საარჩევნო კოდექსში შესატანი ცვლილებების მოამზადებას ისახავს.

ინტერპარტიული ჯგუფი აქცენტს საარჩევნო კოდექსში არსებულ რამდენიმე საკითხზე აკეთებს. შემუშავებულია აუცილებელი ცვლილებების გარკვეული ჩამონათვალიც, მათ შორისაა საარჩევნო სისტემის ცვლილება, საარჩევნო სიების ბიომეტრიული ტექნოლოგიებით ფორმირება, პოლიტიკურ სუბიექტებს შორის თანაბარი საარჩევნო პირობების უზრუნველყოფა და ადმინისტრაციული რესურსით მანიპულაციის აღკვეთა.

აღნიშნულ თემასთან დაკავშირებით და დღევანდელი დღის დეტალების შესახებ „ნიუპოსტთან“ ზურაბ ხარატიშვილმა ისაუბრა.

„დღეს ინტერპარტიული ჯგუფის მორიგი სამუშაო შეხვედრა გაიმართა, დღევანდელ დღეს განხილული იქნა ის პრიორიტებები, რომელზეც ამ ჯგუფმა მომავალში უნდა იმუშაოს, ეს არის 4 პრიორიტეტი, პირველი არის საარჩევნო სისტემის სამართლიანობა, რაზეც ჯგუფმა უნდა იმუშაოს, მეორე თემა არის საარჩევნო ადმინისტრაციის დამოუკიდებლობის ხარისხის ზრდა, მესამე თემა - საარჩევნო სიების დაზუსტება, და მეოთხე საარჩევნო გარემოს თანაბრობის ხარისხის გაზრდა. ჩვენ ვფიქრობთ, რომ ჯერ ეს საკითხები უნდა დავამუშაოთ, ეს არ არის სწრაფი და მარტივი პროცესი, თუმცა ვფიქრობთ, რომ ერთი თვის განმავლობაში ჩვენ შევძლებთ პირველი განსახილველი საკითხების შეთავაზებას არჩევნებით დაინტერესებული მხარეებისათვის და ყველა პოლიტიკური ძალისთვის ხელისუფლების ჩათვლით, ჩვენ ერთი თვის შემდეგ შეგვეძლება უკვე გარკვეული საკითხები წინ წამოვწიოთ“,- განაცხადა ზურაბ ხარატიშვილმა.

როგორც ხარატიშვილმა ჩვენთან საუბარში აღნიშნა, ინტერპარტიულ ჯგუფს ტექნიკურ მხარდაჭერას საარჩევნო სისტემების საერთაშორისო ფონდი IFES უწევს.