მთავრობამ უცხოელთა სამართლებრივი მდგომარეობის შესახებ კანონში ცვლილებები დაამტკიცა

პოლიტიკა - 14:35, 23 Oct, 2014

1523

საქართველოს მთავრობამ „უცხოელთა და მოქალაქეობის არმქონე პირთა სამართლებრივი მდგომარეობის შესახებ, საქართველოს კანონში ცვლილების შეტანის თაობაზე" კანონპროექტი დაამტკიცა.

კანონპროექტის მიზანია „უცხოელთა და მოქალაქეობის არმქონე პირთა სამართლებრივი მდგომარეობის შესახებ" საქართველოს კანონის ამოქმედების შემდეგ, გარდამავალ ეტაპზე, კანონმდებლობით დადგენილი რეგულაციების გამარტივების გზით, საქართველოში მყოფი უცხოელებისათვის საქართველოში ბინადრობის ნებართვის მოსაპოვებლად შეღავათიანი პირობების დადგენა;
საქართველოში კანონიერი საფუძვლით მყოფი უცხოელისათვის საიმიგრაციო ვიზის მიღების შესაძლებლობის მინიჭება შესაბამის ქვეყანაში დაბრუნების გარეშე;
უცხოეთში მცხოვრები თანამემამულის სტატუსის მქონე პირთა საქართველოში გრძელვადიანი ყოფნის სამართლებრივი საფუძვლის შექმნა;
ტრანზიტული ვიზის გაიცემის პირობების გამარტივება, აგრეთვე საერთაშორისო სატვირთო გადაზიდვის მონაწილე პირების მიმართ ტრანზიტული ვიზის მისაღებად შეღავათიანი პირობების დადგენა.

იუსტიციის მინისტრის თეა წულუკიანის განცხადებით ეს ცვლილებები იმ უცხოელებს ეხებათ, რომლებაც მარტიდან სექტემბრამდე საბუთების მოწესრიგება ვერ მოასწრეს და მათ 2015 წლის მარტამდე დრო ეძლევათ ეს გააკეთონ. მისი განცხადებით მათ ამისთვის საკუთარ ქვეყანაში დაბრუნება არ მოუწევთ.

"მათ ექნებათ საშუალება, იუსტიციის სახლში აიღონ შესაბამისი ბინადრობის ნებართვა, თუკი ამისათვის საკმარისი საბუთები ექნებათ. დღეს ასევე დამტკიცდა ცვლილება - ყველა ინგილოს, თუ სხვა ჩვენი ქვეყნის შვილს, თუკი ექნება თანამემამულის სტატუსი, შეეძლება სპეციალური ბინადრობის ნებართვის მოთხოვნით სერვისების განვითარების სააგენტოს მიმართოს, თან ისე, რომ არ მოუწიოს თავის ქვეყანაში წასვლა. ეს შეღავათები მოგვცემს საშუალებას, რომ უცხოელებს, სხვა ქვეყნის მოქალაქეებს მიეცეთ საშუალება, საკუთარი საბუთები პირველ მარტამდე მოაწესრიგონ და თანაც ისე, რომ ჩვენი ვიზა-ლიბერალიზაციის პროცესი ევროკავშირთან არ დაზიანდეს" - განაცხადა წულუკიანმა.

იუსტიციის მინისტრის თქმით ტურისტებისთვის არაფერი არ იცვლება, რადგან ტურისტული, 90 დღიანი ვიზის აღება ისედაც ძალიან მარტივია. ცვლილებებია მხოლოდ სატრანზიტო სატვირთო მანქანების საქართველოს ტერიტორიაზე გაჩერებასთან დაკავშირებით - სატვირთო მანქანების 5-დღიანი სატრანზიტო ვიზა გახდება 10-დღიანი და იმ შემთხვევაში, თუ მათ მანქანა გაუფუჭდათ საქართველოს ტერიტორიაზე, მშვიდად შეძლონ მისი შეკეთება.