„ქართული ოცნების“ ოფისი დაკეტილია - ჯანყარაშვილი სამსახურში არ დადის

პოლიტიკა - 11:47, 23 Oct, 2014

1993

საპარლამენტო უმრავლესობის წევრი, დათო ლორთქიფანიძე აცხადებს, რომ „ქართული ოცნების“ ოფისი დაკეტილია და პრემიერ-მინისტრთან შეხვედრები ჯერ-ჯერობით ვერ ხერხდება.

"ზვიად ჯანყარაშვილი არ იყო საქართველოში, ჯანმრთელობის მდგომარეობის გამო უცხოეთში იმყოფებოდა და ახლა დაბრუნდა. ასე გაგრძელება მართლა აღარ შეიძლება, ასე ცხოვრება წარმოუდგენელია. დღეს კოალიციაში არის ისეთი საკითხები, რომელთა გადაწყვეტაც უკვე სასიცოცხლოდაა მნიშვნელოვანი. მე ხალხთან შეხვედრისას ძალიან მიჭირს ახსნა, რატომ არ არის „ქართული ოცნება“ აქტიური და რატომ არ ხდება რეგიონებში რგოლების ამუშავება. არ შეიძლება, პარტია არსებობდეს მხოლოდ იმისთვის, რომ საარჩევნოდ სიები შეადგინოს. ამ ეტაპზე ჩვენი გადაწყვეტილება ასეთია: სანამ ზვიად ჯანყარაშვილს არ შევხვდებით, მანამდე მაქსიმალურად ვცდილობთ, რომ ვიყოთ გაწონასწორებულები. შეიძლება მავანმა თქვას, რა გახდა ეს შეხვედრა ამდენი ხნის განმავლობაშიო? ის მავანი მართალიც იქნება, მაგრამ ესაა რეალობა. გუნდში არიან ადამიანები, რომლებსაც უფრო ახლო ურთიერთობა აქვთ ზვიად ჯანყარაშვილთან, მე მათ გადავეცი ბევრის პოზიცია, დაჩქარებული წესით უნდა მოხდეს შეხვედრა და დავიწყოთ მუშაობა“, - აცხადებს ლორთქიფანიძე.