პრეზიდენტს აქვს უკიდურესად სიმბოლური და მნიშვნელოვანი დატვირთვა- თეა წულუკიანი

პოლიტიკა - 20:06, 22 Oct, 2014

1622

თეა წულუკიანის განცხადებით არსებობს ხელისუფლების სამი შტო და პრეზიდენტი არის გამაერთიანებელი და გარანტი იმისა, რომ შტოებს შორის ურთიერთობა იყოს ნორმალური.
"ყველა ქვეყანაში, მათ შორის, საქართველოში, სადაც დემოკრატიული სისტემა არსებობს, არის სამი სახელისუფლებო შტო. აღმასრულებელი, სასამართლო და საკანონმდებლო. საკანონმდებლო ხელისუფლებას დავით უსუფაშვილი ხელმძღვანელობს, სასამართლო ხელისუფლებას ჯერ კიდევ კონსტანტინე კუბლაშვილი, ხოლო აღმასრულებელი ხელისუფლების ხელმძღვანელია ირაკლი ღარიბაშვილი. რაც შეეხება პრეზიდენტს, ჩვენი კონსტიტუციით, ის არის გარანტი იმისა, რომ სამი შტო ერთმანეთთან ეფექტიანად იურთიერთებს. ის არის გამაერთიანებელი და გარანტი ტერიტორიული მთლიანობისა. დიახ, პრეზიდენტს აქვს უკიდურესად სიმბოლური და მნიშვნელოვანი დატვირთვა, მისი პოზიცია არის ძალიან დიდი ტვირთი და პასუხისმგებლობა", - განუცხადა ჟურნალისტებს თეა წულუკიანმა.

სახელისუფლებო შტოებს შორის უფლებამოსილების გამიჯვნის საკითხი დღეს სასტუმრო ”თბილისი მარიოტში” მიმდინარე შეხვედრაზე განიხილეს, რომლის ინიციატორები გაერო და გერმანიის განვითარების ფონდი იყვნენ.

ამ საკითხზე ერთად შეკრებილმა პოლიტიკოსებმა და კონსტიტუციონალისტებმა უცხოელ იურისტებთან ერთად სახელმწიფოს მოწყობის მოდელზეც იმსჯელეს, ისინი საპარლამენტო რესპუბლიკის იმ მოდელებს განიხილავდნენ, რომელთა მიხედვითაც შესაძლოა უკონფლიქტოდ გადანაწილდეს ძალაუფლება საქართველოში.